Kawngpui dang tlat tura thu petu chu BJP an ni - ZPM Vice President

ZPM vice president K Sapdanga chuan press statement siamin, Mizoram hrêk rilṭàm tuma Lailapur khuaa Mizorama lut tur lirthei dang tlat tura thu petu chu Assam BJP party an ni tih a chian tak thu leh, chutah chuan BJP-in NEDA leh NDA-a a thawhpui MNF sorkar leh MNF party pawhin mawh an phurh tel ve thu a tarlang.

November 7, Inrinnia Union Home Secretary hoa Assam leh Mizoram chief secretary-te'n video conferencing an neihah, ramri ai mahin kawngpui dan chungchangin sawi a hlawh tih sawiin K Sapdanga chuan, "Assam Chief Secretary chuan Lailapur road block titawp tur chuan central force SSB leh BSF-te hi Assam state sorkar duhna hmunah ngei dah hmasak phawt a phût ta chat a, hei hian he road block hi Assam state BJP sorkar tihtir a nih a rawn puang chiang ta a ni," a ti.

ZPM Vice President chuan, "Road block hi economic blockade ngawt a ni lo a, political blockade a lo ni reng tih a chiang ta hle. Mizorama BJP member-te hian he road block-ah hian mawh an phur tel ve lo thei lo a, NEDA leh NDA-a báwm khata awm MNF sorkar leh MNF party pawh hian mawh an phur tel ve bawk," a ti a; chuvang chuan Mizorama MNF leh BJP-te chu awmze neia ráwl nei thei awmchhun an nih thu a tarlang.

BJP leh NEDA member-te'n Mizoram mipui an hrêkna chu engtin nge an tih dawn tih an lo ngaihchàn dawn thu sawiin, "NGO hrang hrang, YMA, MZP, ZDU-te'n an theih ang anga thâ an thawh pawha a sâwt theih miah loh chhan hi Central leh Assam-a ruling BJP-in a hnuk an vawn tlat vang a ni," a ti bawk.