MZP-in Assam lirthei dang zui

School Education minister Lalchhan­dama Ralte, Transport minister TJ Lalnuntluanga, MLA Lalrinsanga Ralte leh MZP Gen.Hqrs. hruaitute chu nimin khan an inkâwm a; ramria buaina leh Assam-a lirthei dan chungchang an sawiho. MZP hian Assam lirthei an dang chhunzawm

.

MZP president B Vanlaltána chuan, Silchar Mizoram House-a Mizo tángte leh bungraw ṭhenkhat tangkhangte Mizorama phurh luh theihna tura sorkar hmalakna chu lawmawm a tih thu a sawi a; chutih rualin, tuna Mizo IR awmna hmun chu chhuahsan lo tur leh a theih ang anga ramri ngaihsak tura ngenin, ramri hrûl tihhmasawn kawngah sorkarin ṭan la lehzual se an duh thu a sawi.

Minister-te chuan, MZP-te thu thlen hrang­ hrang - Vairengte, Saihapui-V, Phaisen leh Thinghlun khuate hmasawnna turin a ṭul anga hma an lâk nghal tur thu leh, a hlawh­tlinna tura ke an pên tur thu an sawi a ni.

MZP chuan thuchhuah siamin, Silchar Mizoram House-a lirthei tángte chhuahtir an ni chu lawmawm an tih rualin, mipui mamawh bungraw phur lirthei dangte Assam-in an la dang chhunzawm chu hriatthiam har an tih thu an tarlang a, "Assam sorkar kan dem a, India sorkar pawh NH dangtute an su tlang thei lo hian Mizote harsatna engah mah a ngaih lohzia a lantír a ni," an ti.

Assam-ah lirthei dan chhunzawm zel a nih avangin MZP hian Assam lam motor, Mizorama thangkhangte dan chhun­zawm ṭha an ti a, Assam motor ni lo zawng chu chhuah thlaktir ṭha an ti thung. MZP bultuma Buhchangphaia kawng dan mek chu titawpin, Assam motor ni lo zawng chu an chhuahtir a ni.