Synod Resource Centre hawn a ni

Central service leh all India service-a Mizote an luh tam theihna tura mamawh lamna atana Mizoram Synod-in Sikulpui, Sikulpuikawna a buatsaih Synod Resource Centre chu nimin khan Synod moderator Rev. Dr C Lalhlira'n a hawng.

Synod Resource Centre hawnna leh lehkhabu tlangzarhna inkhawm hi Synod executive secre-tary Rev. K Lalrinmawia'n a kaihruai a, Moderator hian Synod hnuaia Zirlai Viltu Committee-in central service leh all India service-a luh tumte tana an buatsaih lehkha-bu pali a tlangzarh nghal bawk.

Kum 2018-a Synod Inkhawmpui chuan all India service leh central service-ah Mizote an tlin tam theih nan hmalak a rêl angin Mizoram Synod chuan a bawhzui a; Synod Executive Committee (SEC) chuan Mizo ṭhalaite central competitive exam-a an tlin tam theih dan tur ngaihtuahtu tur Zirlai Viltu Committee chu kum 2019 khan a din a, sum mamawh tur angte pawh kum 2020 aṭangin budget-ah dah a ni.

Synod Resource Centre hi Sikulpui behchhana din a ni a, all India service leh central service hrang hrang (group A leh B)-a luh tumte tana inzirna leh inbuatsaihna atana din a ni. Centre hi pisa kài ní-ah chauh ni loin, Inrinni leh chawlh ni (holiday)-ahte pawh hawn a ni ang.

Resource Centre-ah hian competitive exam atana ṭangkai tur lehkhabu chi hrang hrang leh chanchinbute dah a ni dawn a, zirlai/ṭhalaite hman ṭangkai turin internet leh photocopier (xerox) chhawp a ni. A remchan angin ṭhalaite pui turin Mizoram chhung leh páwna mithiamte sàwm ṭhin tum a ni bawk. Kohhran páwl thliar loin Mizo ṭhalai, central competitive exam hrang hranga hmachhawn tumte tan inziah luh theih a ni.
Synod Zirlai Viltu Committee chuan central competitive exam hrang hrang tih tumte tana ṭangkai tur lehkhabu pali an buatsaih nghal a, bu khat Rs. 50-in lei theh a ni.

Zirlai Viltu Committee-ah hian Rev. K Lalrinmawia chu convener niin, Synod Education Board secretary (Synod HSS Principal) chu secretary a ni a; member-ah Synod hruaitu dangte bakah, central service officer chàwl tawh pathum - RL Rinawma (IRS), C Lalsawta (IAS) leh Benjamina (IDAS)-te an tel.