MNF-in Martarte Ni an hmang ; Covid-19 zawhah malsawmna hun a thlen ka ring - Zoramthanga

MNF party chuan nimin khan Vanapa Hall-ah Mizo Hnam Martarte Ni vawi 42-na an hmang. MNF president Zoramthanga chuan, Covid-19 zawhah malsawmna hun a thlen a rin thu a sawi.

MNF vice president Lal­thlengliana kaihhruai inkhawmah hian Zoramthanga chuan, "Covid-19 zawhah malsawmna hun a lo thlen hi ka rin dan a ni a, a dik lo thei. Thlarau Thianghlim harhtharna a lo thlen pawh ka ring. Malsawmna ropui tak kan nei ang a, chu chu chanchin ṭha hrilna atan mipui leh kohhrante'n an hmang ang. Thil siam zawng zawng hnena chanchin ṭha hril tura tih kan ni," a ti.

Nationalism chu hnam tinin an neih thu sawiin MNF President chuan, "MNF leh Mizo chuan nationalism piah lam kan nei a, chu chu 'Pathian leh kan ram tan' tih niin, martarte an martar chhan pawh a ni. Hei hi hnam dangin an nei ve lo. Kan thupui hi harsatna hrang hrang kan paltlang theihna chhan a ni," a ti a, Pathian leh kan ram tan tih chu sawi mai ni lo, a taka kalpui chi a nih thu a sawi.

Zoramthanga chuan, kum 60 tling party dang an váng nia sawiin, "BJP pawh an tling lo a, Congress pawh an keh darh kual a, kum 60 an tling lo. Pathian leh kan ram tan kan tih tlat avanga vawiin thleng thei kan ni. Jet fighter leh a dangte leh political power nena MNF an ral dawn titute chu tunah chuan an ral zo ta," a ti.

MNF President chuan, martarte hmabak hlen a ngaih thu sawiin, "Martarte an martar chhan kha ram leh hnam ringawt ni lo, Pathian leh kan ram tan a ni. Hei hi Zoramin a champion pui theihna atan nunna an hlan a ni," a ti a; martarte hmabak hlen turin Pathian leh kan ram tan tih chu phatsan a thian loh thu a sawi.

Luangmuala Martarte Thlan­mual chu Art & Culture depart­ment-ah hlan tum a nih thu sawiin Zoramthanga chuan, "Ram rohlu dang enkawlna tur nen nakkum budget-ah vaibelchhe eng emaw zat dah tum a ni. Covid-19 vangin committee neih hleih theih a ni lo. Ram páwn aṭang pawha tlawh manhla tak turin sorkarin siam se kan duh. Budget buatsaih hma ngeiin committee ṭhutkhawm tum a ni," a ti.

MNF senior vice president Tawnluia pawhin thu sawiin, Mizo hnam history ziah ṭhat theih a ni tawh lo tih a sawi a, "British-in min awp hun lai aṭangin history a chawh chhiat theih tawh loh. Pu Laldenga hoin hnam movement tiin zalenna kan neih theihna turin hnam pasalṭha an lo chhuak a, ram tan nunna hlu tak an hlàn a ni," a ti a; hnam tana nun hlantute chawimawi turin mipui a sáwm.

MNF hian martarte ram tana nunna pete ropuizia leh chawi­mawi tlak an nihzia lantirna atan February 15, 1980 khan September 20 chu Martarte Ni atan a puang a, kum 1980 aṭangin hman ṭan nghal a ni.