Pathianin mipui tan Congress party a húng chhuak leh ngei ang - Hawla

Congress party chuan nimin khan Congress Bhavan-ah an party zawm tharte lawm luhna inkhawm an buatsaih a; thu sawitu MPCC president Lal Than­hawla chuan, Pathianin a hun takah Mizoram mipui tan Congress party a húng chhuak leh ngei dawn niin a sawi.

Lal Thanhawla chuan, tunlaiin a tak hmuh tur awm lo leh tih si loh thusawi ngaihthlak tur tam lutukin Mizo hnam nun nasa takin a tibuai nia sawiin, "Hetiang thusawi ngaithlatu mipui rilru thianghlim takte beidawnna nasa takin a siam a ni. Pathianin Mizoram mipui tan Congress party hi hmanruaah nasa takin a hmang ṭhin a, a hun takah a remruatna fel tak avangin Mizoram mipui tan Congress party hi a húng chhuak leh ngei ang," a ti.

Inkhawm kaihruaitu Lalrindika Ralte, MLA chuan, Congress party-ah danglamna nasa takin a thleng mek niin a sawi a, "Hmun hrang hrangah Congress party tana nghet taka ding tlat mi tam tak an awm reng. Hripui avangin party zawm thartute lawm luhna hun pawh hman hleih theih loh a ni a, hun chêp tak karah fimkhur taka hun hman a ngai a, lo lut mai tur tam tak pawh fimkhur taka lawm luh zel a ni ang," a ti.