2014-2021 chhungin Mizoram aṭangin thlai/thil chi hrang 15 thawn chhuak

Mizoram aṭangin kum tin thlai leh thil dang thar chhuahte state páwnah thawn chhuah ṭhin a ni a, kum 2014-2021 chhungin thlai/thil chi hrang 15 thawn chhuah niin, a tam ber kum a ni. Kum riat chhunga thawn chhuah tam ber kuhva rah chu 40,06,256 thawn chhuah a ni a, a dawttu sawhthing chu quintal 4,09,874 thawn chhuah a ni.

Commerce & Industries (a hmain Trade & Commerce) department-in kum riat chhunga state danga Mizorama thlai thar thawn chhuah dan Vairengte, Kanhmun leh Bairabi checkgate-a an chhinchhiah dan belhkhawma a lan danin, Mizoram aṭanga thlai chi hrang thawn chhuahte a tam ber ṭumin chi 15 thawn chhuah a ni a; chu'ng zingah chuan sawhthing leh kuhva a tam ber.

Kum riat chhung hian kum tin thlai lam chi, chi hrang panga aṭanga chi 15 inkar thawn chhuah a ni a; kum 2019 khan thlai chi hrang 15 thawn chhuah a nih laiin, kum 2020-ah chuan thlai chi hrang nga chiah thawn chhuah a ni thung. Kum 2020-ah hian total lockdown hmain Sialhawk, Chalráng leh khaw dangte lakhuihthei thar eng emaw zat chu Silchar-ah an hralh hman tih an sawi.

Sawhthing chu kum riat chhungin quintal 4,09,874 thawn chhuah a ni a, kum 2015-ah quintal 60 chiah thawn chhuah a nih laiin, kum 2018-ah chuan quintal 2,19,991 thawn chhuah a ni. Kum kal lai 2021-ah June thla thlengin quintal 47 thawn chhuah a ni bawk.

Mizoram aṭanga thawn chhuah zingah kuhva rah (betel nut) a tam ber a, kum riat chhungin qtl. 40,06,256 thawn chhuah a ni a, kum 2019-ah a tam fál hle. Kum 2019-ah hian qtl. 24,54,613 thawn chhuah a ni a, kum 2014 khan qtl. 2,771 chiah thawn chhuah a ni thung. Kum kal mek 2021-ah June thla thlengin qtl. 1,28,500 thawn chhuah a ni tawh.

Commerce & Industries department hotute chuan, Mizoram aṭanga thlai thar thawn chhuahte chu checkgate an neiha an chhinchhiah dan a nih thu an sawi a, "Khawi aṭanga lo kal nge tih thliar ngawt theih a ni lo. A sàn vak bik chhan hi Myanmar aṭanga kuhva tawlh a nih a rinawm," an ti.