ZPM party political strategy chu Pathian aw ngaihthlak a ni - ZPM President

Zoram Peoples Movement (ZPM) chuan nimin khan an party pisa conference hall-ah an pary zawm tharte lawm luhna inkhawm an buatsaih a; ZPM president Lalliansawta chuan, an party political strategy chu Pathian aw ngaihthlak a nih thu a sawi.

Lalliansawta chuan, ZPM chu páwl naupang tê nimahse inthlan awm chi ho chu an hmachhawn ve vek tawh tih sawiin, "Chungah chuan kan mamawh ang chiah zelin, chapo thei miah lo, beiseiawm tak si dinhmunah min dah ṭhin. Beidawng loa insiam ṭha chho zel turin min duh a nih ka ring. Chuvangin, kan party political strategy chu Pathian aw ngaihthlak a ni," a ti.

Serchhip biala Assembly by-election-ah an party an chak thei chu Zoram politics-ah therhlo leh a mawm lam apiang ûmna a awm lo tih tichiangtu a nih thu sawiin Lalliansawta chuan, "A ropuiin an entawn tlak tak meuh meuh a ni," a ti a; Tuirial biala by-election awm turah pawh inthlanna thianghlim leh puitling a awm ngei a beisei thu leh Pathian leh mipui duhsakna ZPM-in an dawn leh ngei a rin thu a sawi.

ZPM party zawm tharte lawm luhna inkhawm hi vice president Dr Kenneth Chawngliana'n a kaihruai a, lawm luhte zingah chief secretary hlui Haukhum Hauzel, IAS (Rtd.) pawh a tel a ni.

Haukhum Hauzel chuan ram rorelna ṭha a awm theih dan tur a lo ngaihtuah ve ṭhin thu sawiin, "Party hrang hrangte'n ram hruai an tum dante pawh ka hmuh ang ang uluk takin ka lo zir ve a ni. ZPM-in 'Kalphung Thar Mipui Sorkar' siam in tum hi a danglam tih ka hmu a, 'a party with a difference' niin ka hria a, ram rorelna ṭha a pian theih beiseina thar ka neih phah. Ṭangkaina chhete tal ka lo neih ve inringin ZPM party mi ni turin ka rawn pen chhuak a ni," a ti.