KHAWTHLIR

Thisen pe
MNF ṭhalai, Mizo National Youth Front chuan nimin khan Martarte Ni pualin Mizo High School-ah thisen pek rûnpui an huaihawt a, Aizawl Civil Hospital blood bank tan thisen unit 41 an pe a, petute mipa 35 leh hmeichhia paruk an ni. Thisen peknaah hian MNYF president Lalrinawma, Assembly deputy speaker leh Health & Family Welfare Board vice chairman Dr ZR Thiamsanga, MLA ten an ṭawiawm a ni.

Tanpuina hlân
Siktui Foundation Trust, Aizawl chuan nimin khan YMA, Ṭhuampui Branch hnenah oxygen concentrator pakhat, oxygen bûr pahnih leh pulse oxymeter pakhat an pe. Thilpek inhlanna inkhawm tawi hi Ṭhuampui YMA president K Lalrimawia'n a kaihruai a, Siktui Foundation Trust chairman M Gouzamang Guite-in a hlan a ni.

UPSC incentive cash award sawiho
Mizoram Youth Commission (MYC), School Education department leh Mizoram Scholarship Board hotute chuan nimin khan MYC conference hall-ah UPSC Incentive Cash Award chungchang an sawiho. A ṭul anga sorkara thlen theih turin MYC kutah dah ni se, an ti.

X-ray khawl hlân
Lunglei DC Kulothungan A chuan Air India Foundation CSR kaltlanga Rs. 3,30,000 man portable x-ray machine pahnih an dawn chu nimin khan Lunglei chief medical superintendent Dr LC Liana leh medical superintendent Dr SR Ngurchamliana te hnenah a hlân.

BJP faina hnatlang

BJP, Mizoram Pradesh chuan Seva Aur Samarpan Abhiyan pualin nimin khan Raj Bhavan bul leh Chite lui tihfai hnatlang an huaihawt a, thing eng emaw zat an phun nghal bawk. Mizoram BJP thupuangtu K Laldinthara chuan, faina leh thing phunah a theih anga tam mi dang tihhmuhtu ni turin BJP member-te a chah a ni.