Luia nungchate humhalh dan tur rel

Lawngtlai District Level Fisheries Conservation Board (DLFCB) chu nimin khan an chairman Dr Andrew H Vanlaldika hoin DC conference hall-ah an ṭhukhawm a, luia nungchate humhalh dan tur an rel.

Dr Andrew H Vanlaldika chuan lui dung leh luia sangha leh nungcha dangte humhalh a ṭulzia sawiin, "Lui leh a chhunga nungchate an enkawl dan chu mi dangin a chhehvela mi chengte an tehna pakhat a ni. Lui leh luia cheng nungchate chuan mihringte tan pawimawhna thuk tak an neih avangin a enkawl kawngah district mipuite kan harh thar a, tihchereu a nih mai loh nana humhalh nachang kan hriat zel a pawimawh," a ti.

DLFCB member secretary Lalremsangpuii, DFDO chuan board hma lakna report pein, hmachhawp tlangpui a sawi fiah. Member kalkhawmte chuan lui humhalh chungchanga hma lak mek dan thlir hoin, hma lak zel dan tura rawtna awmte an sawiho a ni.

Meeting chuan nghafuan hun a nih chhoh leh dawn tak avangin Lawngtlai district chhungah nghafuan humhalh a nih theih nan hma lak an rel. Hemi atan hian Lai Autonomous District Council leh Chakma Autonomous District Council-a a kaihhnawih official-te leh tlawmngai pawlte nen hma lak ho theih dan tur sawi hoa inrawn tlan ni se, tih a ni.