Covid-19 vangin mi 2 thih belh

September 19, Pathianni tlai leh zan khan Mizoramah Covid-19 vei mi pahnih an thih belh a, niminah tlai dar 5 thlengin thi an awm lo. Sorkar chhinchhiah angin, Covid-19 vangin mi 261 an thi tawh a, September thla bikah mi 44 an thi tawh.

Rohmingliana (62), Mualkawi, Champhai chu Pathianni tlai dar 5:20 khan Covid-19 vangin State Referral Hospital-ah a thi. Covid-19 vei a ni tih September 17 khan hmuh chhuah niin, September 18, Inrinni aṭangin SRH-ah enkawl a ni a; hripui vei a ni tih hmuh chhuah aṭanga ni hnihnaah a thi a ni.

Pathianni zan dar 7:10 khan T Pachhinga (84) h/o Vanrami, Tuikual South pawh hripui vangin SRH-ZMC-ah a thi a, hripui vanga Mizorama thi 261-na a ni. Covid-19 positive a ni tih July 25, 2021-ah hmuh chhuah a ni a, July 28 aṭangin SRH-ah enkawl a nih thu sorkar thuchhuakin a tarlang.