COVID-19: Mizoram dinhmun ; Hripui vei 558 hmuh belh a ni

September 19, Pathianni khan Mizorama swab sample 2,879 endik aṭangin Covid-19 vei mi 558 hmuh chhuah a ni. Nimin khan hripui vei dam tawh mi 433 chhuahtir an ni a; Pathianni zan khan mi pahnih an thih belh a, niminah thi an awm lo.

Covid-19 vei Pathiannia hmuh tharte chu mipa 242 leh hmeichhia 316 an ni a; TrueNAT-PCR hmanga hmuh chhuah 18, RAT hmanga hmuh 537 leh Fluo­rescent Immunoassay (FIA) hmanga hmuh pathum an ni. ZMC laboratory-ah swab sample endik a ni lo.

IDSP record angin, Mizoramah Covid-19 vei 79,729 hmuh chhuah a ni tawh a, mipa 39,952 leh hmeichhia 39,777 an ni. Nimin tlai dar 5 thleng khan mi 65,769 (82.49%) chhuahtir an ni tawh a, mi 261 (0.33%) thi tawhin, enkawl mek mi 13,699 (17.18%) an awm. September 19, Pathiannia Covid-19 vei hmuh thar mi 558-te chu symptom nei 395 leh nei lo 163 an ni a; tualchhunga kái 557 leh tun hnaia state pawn aṭanga rawn lut pakhat niin, tualchhunga kái zingah kàina chin hriat loh 330 an awm.

Hripui vei hmuh thar mi 558 zingah nausên kum khat tling lo pasarih an tel a, an zingah symptom nei panga an awm. Kum 70 chung lam mi 23 awmin, an zinga mi 18-in symptom an nei a, symptom nei zingah a upa ber pahnih, kum 89 mite pawh an tel. September thla ni 19 chhungin hripui vei mi 19,728 hmuh a ni tawh a, chawhrualin ni tin mi 1,038.32 hmuh chhuah an awm ang a tling. Kum 2011 chhiarpui aṭanga chhûtin Mizorama Covid-19 vei hmuh tawh 79,729 chu mi 1,000 zelah hripui vei mi 73 an awm ang a ni a; mi 1,00,000 zela Covid-19 vangin mi 24 an thi tawh ang a ni.

Nimin zinga report tihchhuah a nih hnuah Mizoram chuan hripui vei enkawl mek (active case) mi 14,132 an awm a, India ram state-a active case tam lamah parukna a ni zui zel. Hmarchhak state bikah a sang fál a, Mizoram hnaih bertu Assam-ah enkawl mek mi 5,056 an awm. Mizorama Covid-19 positive hmuh tawh aṭanga enkawl mek zat chu 17.73% a ni a, Mizoram dawta enkawl mek tam lama sang ber Kerala chu 3.86% niin, pathumna Sikkim-ah 2.30% (728) a ni.

Nimin khan tlai dar 5 thlengin hripui vei dam tawh mi 433 chhuahtir an ni a; Aizawl district-ah mi 147, Champhai district-ah 124, Kolasib district-ah 78, Mamit district-ah 41, Lawngtlai district-ah 36, Lunglei district-ah panga, Saitual district-ah pahnih leh Hnahthial district-ah pakhat an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 75,285 chu Mizoram chhunga kái chhâwng an ni a, mi 4,444 chu Mizoram páwn aṭanga an rawn luh hnua hmuh chhuah an ni.