Mizoram leh Assam ramri enfiah a ni

Mizoram leh Assam inrinaa Inner Line Reserved Forest, square km. 509 huam chhung chu nimin khan sorkar laipuia Ministry of Home Affairs (MHA) ruahman angin Joint Verification team-in an enfiah ṭan a, vawiinah an chhunzawm leh ang.

Ramri enfiahnaa Mizoram team-te chu Environment, Forest & Climate Change-a conservator of forest Lalthlamuana Pachuau-in a ho a; 1st. IR commandant HL Thangzuala leh a hote'n an veng. Land Revenue & Settlement aṭangin Kolasib-a assistant settlement officer TT Beikhaizi, Kolasib DFO Lalnunzira, Kawrthah DFO Lalduhthlana, Vairengte Joint V/C president Zalawta, Bairabi Joint V/C president J Lalchhuanawma leh MZP president L Ramdinliana Renthlei leh office bearer dangte an tel.

Assam lam aṭanga telte chu conservator of forest Binay Gupta-a'n a ho a; Hailakandi DFO NH Majundar leh officer dangte an tel bakah, venhim hnathawktu police-te an tel a ni.

Thu dawn danin, Inner Line Reserved Forest huam chhunga dan phal loha thil tih leh kutthlak a awm leh awm loh enfiah hna hi Bairabi Zophaiah ṭan a ni a; nimin khan Zophai leh a chhehvelte an enfiah niin, vawiinah pawh Zophai leh a chhehvelte enfiah leh tur a ni.

Nimina Zophai leh a chhehvel an enfiahnaah hian an fang zau lutuk lo a, Zophai leh Tlawng lui kam lehlama Inner Line Reserved Forest huam chhunga dan phal loha in sak 34, kuhva huan leh huan dang eng emaw zat, sangha dil eng emaw zat leh dan phal loha thil tih dangte enfiahin an chhinchhiah a; chu'ngte chu Assam lam thil tih vek nia hriat a ni.

Joint Verification team-te hi naktuk Inrinni leh kar leh Thawhṭanni an châwl ang a, April 17, Thawhlehni aṭangin Vairengte lama Inner Line Forest Reserved area-te enfiah leh a ni ang.

Joint Verification team hian an thil hmuh dante chu MHA-ah an hriattir ang a, chumi hnuah MHA ruahman angin Mizoram leh Assam sorkar hotute'n an sawiho leh dawn a ni.

Inner Line Reserved Forest enfiah tur chungchangah hian April 10, 2018 khan Mizo­ram sorkar aiawhin Kolasib DC R Zarzosanga te, Assam sorkar aiawh Cachar leh Hailakandi district hotute chu Dholai, Cachar district-ah an inhmu khawm a; Inner Line Forest Reserved enfiah dan tur an sawiho a ni.

Inner Line Reserved Forest huam chhunga dan phal loha thil tih a awm leh awm loh enfiah hna hi April 30, 2018 ral hmaa zawh tur a ni.