Multi Level Car Parking cum Bazar lung phûm
Tuikual South-a Aizawl Municipal Corporation (AMC)-in Multi Level Car Parking cum Bazar a siam turah nimin zing khan AMC mayor PC Lalhmingthanga'n lungphùm a phúm. Oarking & Bazar hi cheng nuai 546.62 senga siam tur a ni.
Aizawl Mayor chuan, AMC kaltlangin thil tam tak tih theih ni lo mah se, an sum neih ang angin mipui tan hna an thawh ve ṭhin thu a sawi a, "Aizawl khawpui traffic tâwt lutuk tihziaawmna atan hmalak zel a ni. Bawngkawnah Multi Level Parking siam mek a ni a, maxicab 135 dah theihna siam a ni tawh. Aizawl Venglaiah pawh nikum khan mini parking kan siam zo a ni," a ti.
PC Lalhmingthanga chuan, an intiam angin Property Tax aṭanga sum an hmuh zinga 80% chu mipui tan hman a nih dawn thu sawiin, "Kum 2017-18 khan Property Tax aṭangin cheng nuai 260 hmuh a ni a, chuta ṭanga 80% chu April 1 aṭanga ward tina mipui tana hman turin ruahman a ni tawh. Ward Committee-ten a hmanna tur an rêl ang," a ti a; Aizawl mipuite chu khawpui nuam siam tura thawhpuiah a sáwm.
Tuikual South-a Multi Level Parking cum Bazar hi AMC-in Perfomance Grant leh AMRUT aṭanga sum an hmuh cheng nuai 546.62 hmanga siam tur a ni a, building sakna atan cheng nuai 495 hman tur niin, a bak zawng chu a chhung cheina atan hman a ni ang.
Building-ah hian two wheeler 25 leh motor 75, a vaiin lirthei 100 vel dah theih a ni dawn a, mi 105 vel ṭhut theihna tur bazar siam tum a ni a; hna thawh zawh hun tura ruahman chu March 22, 2018 a ni.