C Lalrempuia thihnaa inhnamhnawiha puh mi 3 police-in an man

March 23, 2018 tlaia C Lalrempuia h/o Laldikkimi, Chanmari West kutthlaktua puh mi pathumte chu April 11, NIlaini khan Vaivakawn police-te'n an man. C Lalrempuia kutthlaktute man an ni ta chu lawmawm an tih thu, Chanmari West Branch YMA chuan an tarlang.

Chanmari West YMA tarlan danin, C Lalrempuia hi March 23 tlai thimhlimah a hnathawk haw lami chu Hunthar Venga B Sarengpuii (L) in bul dawrtêa a thil lei zo kal leh tur chu kutthlak a ni a, chumi zan chuan hliam tuar chungin an in a thleng thei a ni. In a thlen hnuah a lû aṭanga thi a chhuah tam avangin damdawi-in panpui a ni a, zai nghal a ni. An zai zawhah ICU-ah dah nghal a ni a, harh chhuak tawh loin April 6, 2018-ah a thi a ni.

C Lalrempuia kutthlaktua puha police-in an mante chu - Lalhriatkima (21) s/o Lalrizapa, Lalrinawma (22) s/o Kapthanga leh Runhleihfaia (25) s/o Sangliana Haikhawl te an ni a; Dinthar Veng niin an insawi vek a ni.

Chanmari West Branch YMA chuan, an member-pui sawisak vanga a thi chu pawi an tih thu sawiin, "Heng mi sualte hian an sual man tél se, dan hmanga a na thei ang bera hrem ni mawlh rawh se tih chu kan duh dan a ni. Rempuia'n a kalsan a chhungte kan tawrhpui tak zet a ni," an ti a; pawisawi lo kutthlaktute police-in an man chhuak chu lawmawm an tih thu an tarlang bawk.