PRRS lêng vangin vawk 1,146 an thi tawh
Tun hnaia Mizoram hmun hrang hranga vawk natna, PRRS lêng vangin vawk 1,146 an thi tawh a; vawk thite chu AH&Vety department hotute'n an enfiah ṭhin.
AH&Vety department hotute sawi danin, tun hnaia PRRS lêng hi Champhai district-a Zokhawtharah hmuh hmasak ber a ni a, March 16, 2018-ah vawk an thi ṭan. AH&Vety department hotute'n an enfiah nghal a, March 21 khan PRRS a ni tih finfiah a ni.
AH&Vety deputy director (Disease Investigation) Dr K Lalrohlua chuan, vawk thi ṭhenkhat chu PRRS a ni tih finfiah ni mah se, tun hnaia Mizorama vawk natna leng zawng zawng PRRS a ni vek kher lo a, swine fever vanga thi pawh an awm tih a sawi. Lawngtlai leh Siaha district-ah pawh vawk damlo eng emaw zat a awm a, mahse, PRRS vanga damlo a nih leh nih loh finfiah a la ni lo.
Dr K Lalrohlua chuan, vawk natna a darh zel loh nan district pathuma PRRS lênna hmunahte chuan hmun dang aṭanga vawk leh a sa lakluh khapna a nih thu leh, district danga vawk leh a sa thawn chhuah pawh khap a nih thu a sawi a; vawk natna lênna hmun hrang hrangah AH&Vety lamin theihtawp an chuah thu leh, zawi zawiin a rêm tial tial nia hriat a nih thu a sawi bawk.
AH&Vety department hotute chuan, PRRS vanga vawk thi 1,146 zinga hmun thuma ṭhena hmun hnih chu vawk notê an nih thu an sawi a; PRRS chu vawk puitling aiin a note leh a rái laiin an huat zawk avangin, vawk puitling chu damdawia enkawl vat a nih chuan an dam leh mai a, vawk notête erawh chu chhan a harsa deuh niin an sawi.
Serchhipah chuan PRRS vanga vawk thi zat 138 a tling tawh. February thla aṭangin vawk an thi ṭan a, vawk thite hi March thla chawhnu lam khan PRRS a ni tih finfiah a ni.
Serchhipa AH&Vety department chhinchhiah danin, Serchhipa vawk thi tam zual zingah IOC Venga Dinpuii chuan vawk 26 a chán tawh a, Tuikhuah Venga Roluahi'n vawk 11, Lalziki'n vawk 10 leh IOC Venga Nukungi'n vawk pasarih an chan tawh bawk.
PRRS hi Mizoramah kum 2013 leh 2016 khan a lêng tawh a, kum 2013-ah chuan vawk 3,806 an thi a, kum 2016-ah chuan vawk 4,699 an thi a ni.