KHAWTHLIR

Translation award
Mizo Writers Association chuan kum 2017 chhunga Mizo ṭawnga lehkhabu lehlin ṭha ber an thlan mekah, a ṭha zual panga an thlang chhuak tawh a; chu'ngte chu Lalzapara lehlin 'I thil tumte a tak ram thlenpui rawh' tih te, R lalfakawma lehlin 'Kristiante hriat châk' tih te, Malsawmdawngliana lehlin 'Pathian thiltihtheihna ṭawmpui dan' tih te, Lalzarzova Khiangte lehlin 'The Black Panther of Sivanipalli' tihte leh, Bill Chamhlira lehlin 'Thutak thu zir chianna' tihte a ni.

CM-in hawng dawn
Tata Trusts buatsaih football zirna hmunpui, Centre of Excellence, Mualpuia din chu vawiin tlai dár 4 hian chief minister Lal Thanhawla'n a hawng dawn. Centre of Excellence hi naupang zawkte'n mumal taka football an zirna hmun tur a ni.

Chawlh puang
Mara Autonomous District Council (MADC)-a village council inthlan turah mipuiin ṭha taka vote an thlak thlak theih nan vote thlak nî, April 17, Thawhlehni chu Mizoram sorkarin MADC huam chhung bikah chawlhah a puang.

Chhiatna laka inven dan sawiho
Disaster Management & Rehabilitation secretary Lalrinliana Fanai hoin nimin khan Secretariat Conference Hall-ah chhiatrupna laka inven dan tur sawiho a ni. Dr Lalrokima Chenkual-in chhiatrupna laka inven dan tur ruahmanna hrang hrang a sawifiah a; National Disaster Management Authority (NDMA) senior consultant Lt.Gen. VK Datta pawhin thu a sawi a ni.

Ṭiau lei hawng
Thingsai rama Mizoran leh Myanmar inkalpawhna Ṭiau lei dawh chu nimin khan John Siamkunga, MLA-in a hawng. Lei hawn tâk chungchangah hian MSU sub-headquarters, Thingsai chuan thuchhuah siamin, Border Trade Center tihpuitlin atana pawimawh Ṭiau lei hawn a ni ta chu lawmawm an tih thu leh, venhimna lamah pawh a ṭangkai an beisei thu an tarlang.