HPC(D) mi Central Jail aṭangin chhuahtir Vawiinah HPC(D)-te lawm luh an ni dawn

Mizoram sorkar leh HPC(D) hel pawlin inremna thuthlung an siam angin, HPC(D) hel pawl mi Central Jail-a táng mek Lalbieklien chu April 11, Nilaini tlai khan jail aṭangin chhuahtir a ni. Inremna angin, HPC(D) mite chu vawiin hian CTI, Sesawngah lawm luh an ni dawn.

Thu dawn danin, Lalbieklien hi October 16, 2015 khan Assam Rifles-in Manipur-ah an man a, Mizoram police hnena an hlan hnuah jail-ah dah nghal a ni a; kum hnih leh thla sarih chhung a tàn hnuah inremna avangin Nilaini tlai dar 4:20 vel khan Central Jail aṭangin chhuahtir a ni.

Lalbieklien hi March 28, 2015-a Zokhawthiang daia HPC(D)-in MLA pathum an lambun tuma HPC(D) commander a ni.

Mizoram sorkar leh HPC(D) ten April 2, 2018-a inremna thuthlung an ziah angin, HPC (D) hel pawl mi 100-te chu vawiin chawhnu dar 1 hian Central Training Institute (CTI), Sesawngah lawm luh an ni dawn.

HPC(D) mite hi an ralthuam neih zawng zawng, silaimu leh hmanraw dangte nen nunphung pangngaiah an let dawn a; vawiina CTI-a anmahni lawmna inkhawmah hian chief minister Lal Thanhawla khuallian a ni ang a, Home minister R Lalzirliana khualzahawm a ni ang.

Lawmna inkhawm chu Home secretary Lalrinliana Fanai-in a kaihruai ang a, CM Lal Thanhawla leh Home Minister ten thu an sawi bakah, HPC(D) working chairman LT Hmar pawhin thu a sawi dawn a ni.

Lawmluhna inkhawmah hian HPC(D) mi, nunphung pangngaia let turte chuan ram danpui hnuaia ram khua leh tui ṭha ni turin rinawmna thu an tiam dawn a, thutiam hi CID (SB) SP Rodingliana Chawngthu-in a kaihruai ang. Chumi hnuah an ralthuamte Mizoram sorkara pek luh lawmman Home Minister-in a pe dawn a; Chief Minister-in HPC(D) mite inbenbelna atana ṭanpuina, rehabilitation package sorkarin a siamte a pe bawk ang.