Congress sorkar a tla dawn - Zoramthanga

MNF president Zoramthanga chuan, kumina Assembly inthlanpuiah Congress sokar a tla dawn niin a sawi a, "Tunah hian Burma, Bangladesh leh India hian MNF sorkar an nghakhlel hle a, kan chhehvel state pawhin an nghakhlel hle bawk," a ti.

Nimina Saikuti Hall, Lungleia MNF sub-headquarters, Lunglei-in MNF Conference vawi 10-na an buatsaih a hmanpuinaah Zoramthanga chuan, Punjab tih lohah chuan Mizoramah chiah Congress an sorkar tawh tih sawiin, "Kohhran leh NGO leh zirlai pawlte'n thlâkhlelhna pakhat mah an nei tawh lo a, anmahni Congress ngei pawhin sorkar leh tumin hma an la tawh lo," a ti a; Parliament-ah leh state tam zawkah Congress an tlak tawh thu a sawi.

MNF President chuan, kumina Mizoram Assembly inthlanpuiah Congress an tla ngei dawn nia sawiin, "Inthlan hunah a valh kan pawt zîp ang a, Congrese sorkar chu a tlu chiang hle dawn. Burma, Bangladesh leh India hian MNF sorkar an nghakhlel a, kan chhehvel state pawhin an nghakhlel hle bawk. Chumi hunah Mizoram chuan economic leh political-ah hmun pawimawh tak kan chang dawn a ni," a ti.

Zoramthanga chuan, Congress sorkarin Kohhran leh NGO-te remtih lo chungin zu a zuar lui zel nia sawiin, "An zu zawrh hi ṭhenkhat chuan hmeithai siamna khawl ti hialin an sawi," a ti. MNF an sorkar hunah chuan SEDP hmangin economic independent an kalpui dawn tih sawiin, "Chaw, buh leh bâl, thlai leh hriakah mipui kan intodelh ang a, chhung tin sum lakluh nasa takin a pung ang a, kohhran thawhlawm thlengin a pung ang," a ti a; tuna kum 10 chhung eptu lama an awm chu Pathianin an inhmuhchhuah leh intihthianghlimna atana a siamsak a nih thu a sawi.

Conference-ah hian resolution an siam a; MNF president Zoramthanga kaihhruai an rin tâwk thu te, inthlanpui awm turah sorkar ngei an inrin thu te, kawngpui chhe lutuk manganthlak an tih thu te, Aizawl - Lunglei World Bank Road chu kumin fûrpui hma ngeia siam ṭhat an phût thute an tarlang.

Conference-ah hian Zoramthanga'n MNF zawm thar voter 859 a lawm lut a, chungte chu Congress aṭangin voter 779 leh ZNP, MPC leh neutral aṭanga lutte an nih thu MNF thuchhuahin a tarlang a ni.