MPYCC-in sorkar hmalakna ropui an ti

Congress party ṭha­laite chuan nimin khan UDPA department hmalakna Bawngkawn kawng péngṭhuam zauh hna thawh zawh tawh an tlawh a, MPYCC president Dr Lalmalsawma Nghaka chuan, sorkar hmalakna ropui an tih thu a sawi.

MPYCC President chuan, "Sorkar hmalakna ropui tak, Aizawl traffic jam nasa taka tiziaawmtu tur leh khawpui cheitu tur kan sorkar chak tak hnuaia siam zawh a ni ta hi ropui kan ti. Chief minister Pu Lal Thanhawla, UDPA minister Pu Zo­dintluanga leh department thawktu hrang hrangte chungah lawmthu kan sawi a ni," a ti.

Kum 2017-ah Congress ṭhalaite'n thuchhuah siamin, MNF sorkar laia Bawngkawn pêngṭhuam zauhna tur ram land lease cheng nuai 150-a hralh chung­changah MNF president Zoramthanga chu insawifiah tura an phût tawh thu sawiin Dr Lalmal­sawma chuan, "Mipuiin kan mamawh tawh em avangin Bawngkawn kawng pêngṭhuam zauh hna ṭha taka thawh zawh a ni tawh a, mahse, MNF sorkar laia ram hralh phal loh mimal hnena an lo hralh kha MNF President hian sawifiah rawh se kan ti a ni," a ti. MNF president Zoramthanga'n sawifiah a nih tur thu a sawi tawh laiin, tun thlengin a la sawifiah lo tih a sawi a ni.