HPC(D)-te'n rálthuam an tung ; An duhte a tahtawlin kan tihlawhtling ang - CM

Hmar Peoples' Convention (Democratic)-te chuan nimin khan Central Training Institute (CTI), Sesawngah an rálthuamte an tung a, an silaite Home minister R Lalzirliana hnenah an hlan. He hun hmanpuitu, chief minister Lal Thanhawla chuan, HPC(D)-te thil duhte chu a tahtawla an tihhlawhtlin tur thu a sawi.

Ralthuam tun inkhawmah hian CM Lal Thanhawla chuan, "Sinlung Hills Council atana an thil thlente hi kan hriat sa, tihmâkmawhte a ni. Inremna a awm takah chuan a pawimawh dan azirin a tahtawlin kan tihlawhtling ang. Sorkarin tih theih chin a nei a, tih theih lohah chuan innawr vakin awmzia a nei lo," a ti.

Lal Thanhawla chuan, Congress party leh sorkarin inrempui theih apiang remna siampui a duh thu sawiin, "HPC(D)-te pawh an tam leh tlem ngaihtuah loin, anmahni leh mipuite'n an tawrh avangin inremna kawng zawnga inbiak a ni a, hun eng emaw chen hnuah a hmáwr bâwk theih a ni. Sorkar kan lawm a, HPC(D)-te pawh an lawmin ka hria," a ti a; HPC(D)-te chu thlamuang taka awm turin a chah.

Home minister R Lalzirliana pawhin thu sawiin, "An silai min hlan laia an hmel ka hmuh khan mittui nen silai an tung tih a lang. Silai ni loin, pentui nen ram hmasawnna ngaihtuah a ngai tih an hria hi lawmawm hle," a ti a; HPC(D)-te chu thinlung taka a lo lawm thu a sawi.

Home Minister chuan, Mizoramin kum 30 chuang remna leh muanna kan chen tawh laiin Hmar unaute chu rilru thlabára an awm reng thu sawiin, "Hlau leh thlabára awm ṭhinte hlim leh lawm taka insuihkhawm zai rel a ni ta hi a lawmawm hle a ni," a ti.

Tuna remna siampui ni lo zawk, HPC(D) ramhnuaia awm an la awm tih sawiin HM Zira chuan, "Zoram hawia silai an chelek a nih chuan unau kan nih anga inhlahthlemna a thleng tawh lo ang," a ti a; HPC(D) silai tung tate chungah ramhnuaia la awmte chu an inlulin sorkarin a phal dawn loh thu a sawi.

HPC(D) working chairman LT Hmar pawhin thu sawiin, "Mipui hmakhua ngaia thih ngama inbeihna chawlhsan a, ralthuam in tung ngam hi a lawmawm hle. A huna inphahhniam ngamna hi huaisenna dik tak a ni. Kum 23 aia rei kan harsatna leh thil phût chinfel a nih theihna atana sorkar kan nawrnaa nunna chánte zahna chibai ka bûk a ni," a ti.

Inkhawmah hian Home minister R Lalzir­liana chuan ralthuam an tun tak hlutna hû cheng nuai 7.14 chu HPC(D) working chairman LT Hmar hnenah a hlan a; HPC(D) mite chhawm­dawlna tur cheng vbc. 3.42 chu CM Lal Than­hawla'n LT Hmar hnenah vek a hlan thung.

Inremna anga HPC(D) mi nunphung pangngaia lette hi silai keng (arm cadre) mi 102 leh council member 12, an vaiin 114 an ni a; CID(SB) SP Rodingliana Chawngthu kaihhruaiin rinawmna thu tiamtir an ni.

HPC(D)-te thutiam chu, 'Kan ram tan rinawm taka awmin, India danpui hi rinawm takin ka vuan zel ang. Mizoramah remna leh inlungrualna a awm theihna atan sorkar theihtawpin ka ṭanpui ang. He ka thutiam hi thutawp a ni a, hnuh kîr theih a ni tawh lo a, thutiam dang ka lo neih tawhte min phuarna ata pawh min tifihlim vek a ni,' tih a ni.

HPC(D)-te lawmna leh rálthuam tunna inkhawmah hian minister, MLA leh sorkar official eng emaw zat an tel.