Nov. 2021-ah Tuirial by-election rawt ; MNF party candidate tur K Laldawngliana ; Party dangin candidate tur an la tifel ve lo

Mizoram sorkara Election department chuan Tuirial Assembly constituency by-election neih hun atan November 2021-a buatsaih turin Election Commission of India (ECI)-ah rawtna an thlen. Rorel lai MNF party chuan Tuirial bial by-election-a an candidate atan K Laldawngliana, Dinthar, Aizawl an ruat a; political party dangte'n candidate tur an la tifel lo.

Election department hotute hnen aṭanga Vanglaini thu dawn danin, ECI hotute'n video conferencing kaltlangin Tuirial Assembly by-election hun atana ṭha an tih an rawn ráwn a, kumin November thla an lo rawt a ni. Mahse, hripui léng mek dinhmun thlir a ngai dawn a, boruakin a zir loh chuan inthlan buatsaih theih a ni dawn lo.

Election department hotute chuan, by-election nei turin an inbuatsaih ṭan tawh thu an sawi a, "Company lamte lo chhoin electronic voting machine (EVM) leh voter verifiable paper audit trail (VVPAT)-te ṭum khat endik a ni tawh," an ti.

Nimina MNF Nomination Committee member-te an president Zoramthanga hoa ṭhukhawm chuan Tuirial bial MLA by-election-a an candidate atan MIZOFED chairman ni lai K Laldawngliana an ruat a ni.

MNF hruaitute hnen aṭanga thu dawn danin, K Laldawngliana hi MNF Gen.Hqrs-ah executive member leh MNYF-ah secretary a ni ṭhin a, MIZOFED chairman a nih hnuah party-ah nihna a nei tawh lo.

Hetih lai hian, political party dangte chuan candidate tur an la puang lo. Vanglaini palai zawhna chhángin Congress vice president Lalsawta chuan, Tuirial bial by-election atan candidate tur an tihfel thawkhat tawh thu a sawi a, "Rei lo têah kan tihfel theih ka beisei. Candidate tur kan nei ṭha a, tling ngei tura kan ngaih kan theh chhuak ang," a ti.

ZPM president Lalliansawta chuan, candidate tur an la tihfel loh thu Vanglaini a hrilh a, "Nomination ṭum khat kan ṭhukhawm tawh a, mihring hming lam rîk a la awm lo. Boruak kan thlir kual ve chauh a ni," a ti a; candidate la tifel lo mah se, Campaign Committee leh ṭul dang ṭhenkhat erawh an inruat tawh thu a sawi.

Vanglaini palai zawhna chhángin Mizoram BJP president Vanlalhmuaka chuan, Tuirial by-election awm turah candidate neih ngei an tum thu a sawi a, "Candidate nei ngei dawn mah ila, kan la tifel lo," a ti.

Tarlan tawh ṭhin angin, Tuirial bialtu MLA Andrew H Thangliana chu August 17, 2021 khan a thi a, chuvang chuan a Tuirial AC chu bial ruak niin, by-election buatsaih a ngai dawn. Tuirial AC hi bial ruak a ni tih August 18, 2021 khan puan a ni a, bial ruaka puan a nih aṭanga thla ruk chhungin by-election buatsaih tur a ni.