Covid-19 Delta Plus variant Mizorama mi 3-ah hmuh a ni

Mizoramah Covid-19 Delta variant aia inkài chhâwn awlsam zawk Delta Plus variant vei an awm tawh tih Covid-19 thupuangtu Dr Pachuau Lalmalsawma'n nimin khan a puang. Delta Plus hi Delta aiin 60%-in kai a awlsam zawk nia tarlan a ni.

Dr Pachuau Lalmal­sawma chuan, National Institute of Biomedical Genomics (NIBMG), Kalyani, West Bengal-ah tun hnai khan RT-PCR hmanga hmuh chhuah Covid-19 positive zinga swab sample 350 chu whole genome sequen­cing tih turin an thawn a, sample 350 zinga 316 (90.30%) chu Delta variant kai an nih thu leh, chu'ng zinga pathum chu Mizorama la awm ngai lo Delta Plus variant kai an nih thu a sawi.

Sample 350-te chu kumin August thla khan NIBMG-ah thawn a nih thu sawiin Dr Lalmal­sawma chuan, "Hri thar kai hmuh chhuah zingah hian Mizoramah a awm tih la finfiah loh Delta Plus variant pathum a tel. Delta Plus variant-te hi Champhai district-a mi pahnih leh Kolasib district-a mi pakhat an ni," a ti.

Covid-19 thupuangtu tarlan danin, sample 350 thawn zinga 70-ah Delta variant chhungkaw zinga mi Delta Lineages an tih, mithiamte'n an zir chian mek leh a hming an la phuah loh hmuh tel a ni.

Aizawl, Lunglei, Kolasib, Champhai leh Serchhip district aṭanga swab sample thawn zinga 213-ah Delta variant pangngai leh Champhai leh Kolasib district aṭanga thawn zinga pathumah Delta Plus variant hmuh a ni a; Mizoram aṭanga sample endik tura phaia thawn tawhte aṭangin Covid-19 hri thar kai 510 hmuh a ni tawh.

Mipuite fimkhur tura chahin Dr Pachuau Lalmal­sawma chuan, "Hri kai leh kai loh test ngai lo tura mahni hmun ṭheuhah Covid-19 laka nun dan tur uluk taka kan zawm a pawimawh zual ta hle a ni," a ti.