CM leh NITI Aayog hotute inkâwm

Chief minister Zoramthanga leh NITI Aayog member VK Paul leh a tawhpuite chuan September 20, Thawhṭanni khan internet kaltlangin Mizorama hmasawnna ruhrel din chungchang leh NITI Forum-in hmarchhak state-te tihhmasawnna atana hmalakna tur a thlurbingte chungchang an sawiho.

NITI Forum-in hmarchhak state-te tihhmasawnna atana hmalakna tur a thlurbingte chu - mau leh rua, thingpui, sangha leh bawnghnute thar tihpun leh tourism tihhmasawnte a ni.

CM Zoramthanga chuan, sorkar laipuiin hmarchhak state-te tana 10% gross budgetary support (GBS) kaltlanga hmasawnna sum a pek chhuah dan chu ennawn ṭul a tih thu a sawi a; NEC leh DoNER kaltlanga sum pek ṭhin a tlakhniam viau thu leh state-te'n an chanpual tur ang an dawn theih nan leh ṭangkai zawka sumte hman a nih theihna tur rawtnate a thlen. Special assistance to state for capital expenditure (SASCE) hnuaia Mizoram chanpual tura ruat chu mipui thleng phak tura pek chhuah thuai a nih theih nan hmalak ni se a ti bawk.

NITI Aayog report-a a lan danin, kum 2011-12 aṭanga 2019-20 chhung khan Mizoram chu hmarchhak state dangte nen khaikhinin gross value added (GVA)-ah a ṭhanna a sang ber. Sustainable Development Goals (SDG) tehfung hrang hrangah Mizoramin a ti ṭha thawhkhat a; hmarchhak state-a district zingah Serchhip district chu pangana a ni.

NITI Health Index 2020-ah Mizoram chu hmarchhak state zingah pakhatna a ni a, School Education Quality Index 2019-ah palina a ni. Innovation Index-ah pathumna a ni a, Ease of Doing Business-ah pahnihna a ni bawk.

Chief Minister hi Planning & Programme Implementation secretary Lalmalsawma Pachuau, principal adviser-cum-additional secretary Dr Lalrinchhana leh officer dangte'n an ṭawiawm a ni.