Mizoramah Vanijya Saptah hman ṭan a ni

Azadi Ka Amrit Mahotsav puala sorkar laipuia Commerce department-in September 20-26, 2021 chhunga insumdawn tawnna hapta ‘Vanijya Saptah’ a hman mek chu Mizoramah pawh nimin aṭang khan hman a ni.

Vanijya Saptah hawnna inkhawm hi Commerce and Industries minister Dr R Lalthangliana hoin Aijal Club-ah neih a ni a; Ports, Shipping and Waterways minister Sarbananda Sonowal-a'n video conferencing kaltlangin a hmanpui.

Sarbananda Sonowal chuan, India thil siamte ram danga hralh chhuah lamah beihpui thlak mek a nih thu a sawi a, "Kumin sorkar kum chhung ngei hian US dollar maktaduai 400 hû hralh chhuah tum a ni. Hmarchhak state, a bik takin Mizoram hi ram pahnih kárcheha awm a nih avangin he hmalaknaah hian a pawimawh hle dawn a, in hmaa chona lian tak awm hi hlen chhuah tum ang che u," a ti.

Dr R Lalthangliana chuan, Ministry of Commerce leh Federation of Indian Export Organisation hmalakna chu Mizoramin a chhawr ṭangkai ve ngei a beisei thu sawiin, "Mizoram economy 60% chu lo neih leh thlai tharah a innghat a, state GDP pawh 66.14% chu agriculture leh a kaihhnawihin a hauh a ni," a ti a; chemical an hman tlem avangin Mizoram thar chhuahte hriselin rintlak mah se, investment lamah harsatna a awm ṭhin avangin hralhnaah harsatna an tâwk tih a sawi.

Bangladesh leh Myanmar ramria land custom station kaltlanga insumdawn tawnna turah border haat sakna atan sorkar laipuiah rawtna a thlen thu sawiin R Lalthangliana chuan, "Ramria sumdawnnain hma a sawn zel theihna turin state sorkar chuan India-Bangladesh inrina leh India-Myanmar inrinaah border haat pali ve ve sakna tur sorkar laipuiah rawtna ka thlen tawh a, Chittagong port chhawr ṭangkai a, international market lian zawka luh theih beiseina kan nei," a ti.

Commerce & Industries Minister chuan, Kaldan Multi Modal Transit Transport Project leh Zorinpui Land Custom Station puitlin hun an nghahhlelh thu leh chumi kaltlang chuan Myanmar-a Sitwe port nen inkalpawhin international market bakah, India ram khawpui dangte pawh lawng hmanga kalpawh theihna kawng a inhawn dawn thu te, foreign ramte nen ṭha taka insumdawn tawnna kalpui a nih theih nan hmasawnna ruhrel din te, kawng siam leh a awm sa chei ṭhat leh lui hmanga inkalpawhna tur riverine route siam a pawimawh thute a sawi.