KHAWTHLIR

MYC leh MZU-in Thuthlung ziak
Mizoram University (MZU)-in Online Learning & Online Programme hnuaia skill training a buatsaih zinga ṭhenkhatah Mizoram Youth Commission (MYC) leh MZU chuan thawhhona thuthlung an ziak. Thuthlungah hian MYC chairman Dr Vanlalṭanpuia, MLA leh MZU registrar Prof. Lalnundanga ten hming an ziak a ni.Thawhhona hmang hian MYC chuan UGC-in a pawmpui hnuaia MZU-in online-a skill training programme a buatsaih chu kum hnih chhung a tumsak (sponsor) dawn a ni.

SMATEE chungchang
Higher & Technical Education Joint Director (Tech.) chuan naktuk September 23, 2021-a State Medical and Technical Entrance Examination (SMATEE) 2021 second phase exam turte chu www.smatee.com leh dhte.mizoram.gov.in aṭanga admit card download tur leh passport size thlalak bel turin a hriattir. Hriat tur pawimawhte chu dhte.mizoram.gov.in leh www.smatee.com ah en theih a nih thu a tarlang bawk.

Ramri-ah thawhho rêl
Mizo Zirlai Pawl (MZP) leh Mizoram Earthmovers Owner’s Union hruaitute September 20, Thawhṭannia inkawm chuan Mizoram leh Assam ramri chhehvel hmasawnna atan kawng laih a nih theih nan thawhho an rél. MZP leh MEOU-in thawhho an tum dan chuan, ramri leh a chhehvel tihhmasawn a nih theih nan MZP-in mipuiah vehbûr an khawn ang a, sum tling khawm hmangin MEOU-te'n hlawh leh hlâwkna ûm loin hna an thawk dawn a ni.

Hmalakna sawiho
District Steering Committee on Anaemia Mukh Bharat chu nimin khan Aizawl bawrhsap Dr Lalhriatzuali Ralte hoin an ṭhu a, nausen thla ruk leh puitling kum 49 inkarte thisen tlâkchhamna laka an him theihna tura hmalakna leh hmachhawpte an sawiho. Bawrhsap chuan, Health department hnuaia Aizawl East leh West CMO-a thawk te, School Education department leh Women & Child Development department-te ṭanrual a ngaih thu a sawi.