India rama Covid-19 dinhmunah Mizoram dinhmun a chhe zual zel

India rama state 28 leh union territory pariat zinga Covid-19 dinhmunah Mizoram dinhmun a chhe zual zel a; September 20, Thawhṭannia Covid-19 vei hmuh tam lamah Mizoram chu state leh UT 36 zingah palina a ni a, hripui vei enkawl lai (active case) tam lamah palina a ni bawk.

Nimin zing lama sorkar laipui tarlan danin, Thawhṭanni khan Mizoramah Covid-19 positive mi 1,731 hmuh chhuah a ni a; Mizoram aia Covid-19 positive hmuh chhuah tamna state pathum chiah a awm a, chungte chu - Kerala-ah mi 15,692, Maharashtra-ah mi 2,583 leh Tamil Nadu-ah mi 1,661-te a ni.

Nimin zinga Covid-19 positive report tihchhuah a nih hnuah Mizoramah hripui vei enkawl mek (active case) mi 15,140 an awm a, active case tam lai ber a ni. India ramah active case tam lamah hun eng emaw chen parukna a nih hnuah Karnataka leh Andhra Pradesh lehpêlin palina a ni tawh a; Mizoram aia active case tamnate chu Kerala, Maharashtra leh Tamil Nadu-te chiah a ni tawh.

Hmarchhak state bikah Mizoramah hripui vei enkawl lai an tam fál hle a, Mizoram (15,140) hnaih bertu Assam-ah chuan enkawl mek mi 4,984 an awm a, Manipur (mi 2,183)-in a dawt leh a ni. Thawhṭannia Covid-19 vei thi tam lamah Mizoram chu hmarchhak state-ah pahnihna a ni bawk.

Mizorama Covid-19 positive hmuh tawh aṭanga enkawl mek zat chu 18.59% a ni a, Mizoram dawta active case sànna ber Kerala chu 3.70% niin, pathumna Meghalaya-ah 2.38% (1,896) a ni.