Covid-19 vangin mi 267 an thi tawh

Covid-19 vangin September 20, Thawhṭanni zan khan mi pahnih an thi a, nimin khan tlai dar 5 thlengin mi pali an thi bawk. Sorkar chhinchhiah angin, Mizoramah Covid-19 vangin mi 267 an thi tawh a, September thla bikah mi 50 an thi tawh.

K Lalhruaia (45) h/o C Lalbiakdiki, Zemabawk North chu September 20 zan dar 7:20 khan State Referral Hospital-ah a thi a, nimin khan vui a ni.

A chanchin ziahnaa tarlan danin, K Lalhruaia hi September 11, 2021 aṭangin a khua a sik a, September 15-a Rapid Antigen Test (RAT) hmanga a swab sample endiknaah Covid-19 a vei tih hmuh a ni. September 16-a RAT hmanga endik nawnnaah a negative a, a chhungte an positive thung. September 17-ah Greenwood Hospital-ah RAT hmang bawka endik leh niin, a negative leh bawk. Covid-19 symptom a neih avangin September 18-ah a sample lak leh niin, RT-PCR hmangin endik a ni a, Covid-19 positive a ni tih September 19-ah hmuh chhuah a ni.

Covid-19 positive a ni tih hmuh chhuah a nih hnuah SRH-ZMC-ah dah luh nghal a ni a, ni khat hnu, September 20 zanah a thi zui a ni.

September 20 zan vêk dar 11:35 khan K Lalrosanga (63), Lunglei Bazar Veng chu hripui vangin SRH-ah a thi. Covid-19 positive a ni tih August 27-ah hmuh chhuah niin, September 15-ah SRH-ah dah luh a ni a, natna dang nei enkawl lai a nih thu sorkar thuchhuakin a tarlang.

Samsul (75) h/o Ramfangzauvi, Ramhlun Venglai chu nimin zing dar 5:55 khan hripui vangin SRH-ZMC-ah a thi. Sorkar thuchhuak chuan, August 29 khan hri a kai tih hriat chhuah niin, hemi ní hian admit nghal a ni a, natna dang nei, enkawl lai a ni," a ti.

Nimin zing dar 7:30 khan Holencha (25), Mualṭhuam, Mamit district chu hripui vangin a thi. Covid-19 vei a ni tih September 16 khan hmuh chhuah niin, inah an inenkawl a, a dinhmun a ṭhat loh avanga nimin zinga Kawrtethawveng PHC (damdawi-in) panpui a nih laiin kawng lakah a thi a ni.

Nimin vêk zing dar 9:50 khan Sangluaia (94) h/o Lawichawngi, Zemabawk chu Covid-19 vangin SRH-ah a thi a, nimin khan an inah vui a ni. Covid-19 positive a ni tih September 12-ah hmuh chhuah niin, September 20, Thawhṭanni khan SRH-ah dah luh a ni a, SRH-a dah luh tûkah a thi a ni.

Zokhuma (82), Muanna Veng pawh nimin chhun dar 1 khan hripui vangin SRH-ah a thi a, hripui vanga thi 267-na a ni. Covid-19 vei a ni tih September 5-ah hmuh chhuah niin, SRH-ah enkawl nghal a ni a; natna dang nei inenkawl lai a nih thu sorkar thuchhuakin a tarlang.