Mizo ṭawngah research project kalpui rél

Mizo Language Board (MLB) Study Team chu an chairman L Thangmawia, MLA leh Human Resources Development (HRD) board vice chairman hoin nimin khan an ṭhukhawm a; hmalak dan tur sawihoin, Mizo ṭawng chungchangah minor research project kalpui an rél.

Ṭhutkhawmah hian, minor research project kalpui an rél a, buaipui turin Pachhunga University College-a Mizo department assistant professor H Laldinmawia an ruat.

Project-ah hian Mizo ṭawng ṭobul leh a ṭhan dan chhui chian te, Mizo ṭawng kalhmang leh nihna chhui zau te, Mizo ṭawng hmasawn zel theih dan tur chhui leh innghahna tlaka Mizo ṭawng chanchin chhui chiante tih a ni dawn a, thla li chhunga zo tura beisei a ni.

Mizo ṭawng chungchangah webinar buatsaih an rel a, Mizoram Board of School Education kutah an dah. Zirna kaihhnawiha webinar buatsaih hrang hrangte feedback leh a kaihhnawihte zir chiang turin Mizoram University-a Education department-a mi Prof. Lynda Zohmingliani chu kum khat chhung atan consultant-ah a ruat bawk.

Ṭhutkhawmah hian MBSE president JH Zoremthanga, Synod HSS principal hlui Rozama Chawngthu, HATIM principal hlui Dr Chawngthanpari leh member-secretary VL Kroshnehzova te an tel a ni.