Puan-in supply tur dik taka thlang turin sorkar an phût

ZPM Ṭhalai chuan thuchhuah siamin, Police department-in puan-in (tent) lei tum dan chu an thlithlai reng dawn tih an tarlang a, puan-in supply tur chu dik taka thlang turin Mizoram sorkar an phût.

Police department-in puan-in 30 leina tur tender a chhuah chu lawmawm an tih rualin, thil hmanhmawhthlâk ni loah restricted tender koh a nih fo lai a, ramria duty police-te mamawh em em leina tura sorkarin tlaikhawhnua tender a ko leh si chu pawi an tih thu ZPM ṭhalaite chuan an tarlang a, "MNF kaihhruai sorkar hian Mizoram venghimtu police-te a ngaihsak tâwk lo hlein kan hria a, MNF MLA-te chu ramri buaina chungchangah a phawvuaka ral mai lo a, ngaihtuahna séng tak tak turin kan phût a ni," an ti.

Assembly House-ah ZPM MLA-te chu police thuam chak kawngah nasa takin an lo au chhuak tawh ṭhin tih sawiin ZPM Ṭhalai chuan, "House páwnah pawh ZPM ṭhalaite'n nasa takin police-te tan aw kan lo nei tawh ṭhin," an ti a; police tana puan-in supply tur chu dik taka thlang turin sorkar an phût a ni.