Mizorama kawngpui siam mek sawiho

Road & Infrastructure Development Board chuan nimin khan an vice chairman H Lalzirliana, MLA hoin Mizoram hmun hrang hranga kawngpui siam mek chungchang an sawiho.

Ṭhutkhawmah hian national highway no. 44A, 102B, 6 leh 54 kawngpuia hna kal mek an sawiho a; Ministry of Road Transport and Highways-a kum hnih táng tawh NH-44A revised estimate chinfel thuai a nih theih nan ruahmanna an siam a, hna thawh hun (working season) hmasa bera zo thei tura hmalak dan tur an sawiho bawk.

Tun dinhmunah NH-44A Dapchhuah-Dampui inkar kawng siam mek chu fûr ruahtui avangin kaltlang a harsa a, fûr chhung atana inkalpawhna turin Dapchhuah-Dampui diversion road chu chei ṭhat hna thawh thuai ni se, an ti.

NHIDCL hotute nen kawngpui siam hna thawh mek hrang hrang - NH-54 (Aizawl-Tuipang), NH-6 (Seling-Dulte-Champhai), NH-102B (Keifang-Tuivai), Lunglei-Tlabung, Vairengte-Sairang, Muallungthu-Sihhmui leh Aizawl by-pass road tura hmalakna chungchang sawiho a ni bawk a; ram leilung awm dante zir chianga ṭha taka hna thawk turin meeting chuan thawktute an ngen.

Mizorama national highway hrang hrang siam mektu construction company-te chu chak tak leh dik taka hna kalpui zel turin an hriattir a, a ṭul angin Board leh department-in an en zui reng tur thu an hriattir bawk.

Ṭhutkhawmah hian RIDB member te, PWD Engineer-in-Chief, NHIDCL, Ratna Infrastructure leh PWD hotute an tel a ni.