Covid-19 vei hmuh tam ber ní Mi 1,731 hmuh belh a ni
September 20, Thawh-ṭanni khan Mizoramah swab sample 9,344 endik aṭangin Covid-19 vei mi 1,731 hmuh a ni a, hripui vei hmuh chhuah tam ber ní a ni.
Nimin khan hripui vei dam tawh mi 847 chhuahtir an ni a, hripui vangin Thawhṭanni zanah mi pahnih leh niminah mi pali an thi.
Covid-19 vei hmuh tharte chu ZMC laboratory-a hmuh chhuah 457, TrueNAT hmanga hmuh 26, RAT hmanga hmuh 1,226 leh Fluorescent Immunoassay (FIA) hmanga hmuh chhuah 22 a ni a; mipa 805 leh hmeichhia 926 an ni.
September 20, Thawh-ṭanni Covid-19 vei hmuh thar mi 1,731-te chu symptom nei 807 leh nei lo 924 an ni a; tualchhunga kái 1,695 leh tun hnaia state pawn aṭanga rawn lut 36 niin, tualchhunga kái zingah kàina chin hriat loh 755 an awm.
IDSP record angin, Mizoramah Covid-19 vei 81,460 hmuh chhuah a ni tawh a, mipa 40,756 leh hmeichhia 40,704 an ni. Nimin tlai dar 5 thleng khan mi 66,904 (82.13%) chhuahtir an ni tawh a, mi 267 (0.33%) thi tawhin, enkawl mek mi 14,289 (17.54%) an awm.
Thawhṭannia Covid-19 vei hmuh chhuah zingah hian Farkawn khaw mi 29 an tel a, chu'ng mi 29 zinga mi 27 chu Myanmar aṭanga tun hnaia rawn lut ráltlânte an ni.
Hripui vei hmuh thar mi 1,731 zingah nausên kum khat tling lo 22 an tel a, an zingah symptom nei pasarih an awm a; a naupang ber thla khat mi pahnih zinga pakhat zawk pawhin symptom a nei. Kum 70 chung lam mi 44 awmin, an zinga a zatvein symptom an nei a; kum 90 chung lam pathum awmin, an zinga pakhatin symptom a nei a, a upa ber chu kum 94 a ni.
September thla ni 20 chhungin hripui vei mi 21,460 hmuh a ni tawh a, chawhrualin ni tin mi 1,073 hmuh chhuah an awm ang a ni. Ni 20 chhung hian Covid-19 positive hmuh tam ber thla a tling tawh.
Kum 2011 chhiarpui aṭanga chhûtin Mizorama Covid-19 vei hmuh tawh 81,460 chu mi 1,000 zelah hripui vei mi 74 an awm ang a ni a; mi 1,00,000 zelah Covid-19 vangin mi 24 an thi tawh ang a ni.
Nimin khan tlai dar 5 thlengin hripui vei dam tawh mi 847 chhuahtir an ni a; Aizawl district-ah mi 569, Lawngtlai district-ah 128, Serchhip district-ah 56, Champhai district-ah 53, Mamit district-ah 30, Kolasib district-ah 10 leh Hnahthial district-ah mi pakhat an chhuak.
Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh zinga mi 76,980 chu Mizoram chhunga kái chhâwng an ni a, mi 4,480 chu Mizoram páwn aṭanga an rawn luh hnua hmuh chhuah an ni.
