KHAWTHLIR

Thisen pe
KM Higher Secondary School NSS unit chuan, nimin khan an sikulah blood donation camp an huaihawt a, zirlai mipa 33 leh hmeichhia 15-te'n Aizawl Civil Hospital tan thisen unit 48 an pe.

Chawlh puang
April 20, 2018-a Chakma Autonomous District Council (CADC)-a General Election awm turah mipuiin ṭha taka vote an thlak theih nan Mizoram sorkar chuan vote thlak ni, April 20 chu CADC huam chhung bikah chawlhah a puang.

Mi 1,186 admit
March 2018 chhung khan Aizawl Civil Hospital (ACH) Casualty leh OPD-ah mi 32,939 an inentir a, mi 1,186 admit an ni. Nau piang 367 an awm laiin, mi 26 an thi a; zai mi 1,643 x-ray-a en mi 1,730, laboratory-a en mi 62,242 leh Mizoram páwna refer mi 258 an awm bawk.

MRBOA meeting
Mizoram Rural Bank Officers’ Association (MRBOA) chuan, nimin khan Berawtlanga Multipurpose Hall-ah General Body Meeting vawi 15-na an hmang. He hunah hian MRBOA member thar mi 22 lawmna hun leh pension-a chhuak mi panga thlahna hun an hmang a; All India Regional Rural Bank Employees Association (AIRRBEA) hnuaia Women Sub-Committee chairperson Lalngaihawmi Pachuau chawimawina an hlan bawk. MRBOA-ah hian member 181 an awm mek a ni.

Study tour atan sum dah
Mizo Students Union (MSU) chuan thuchhuah siamin, Mizoram sorkarin zirlaite study tour/excursion neihna atan sorkarin budget-ah sum a dah ta niin an tarlang a, "UT hnu kum 1987 aṭanga kum 30 zet ral hnua zirlaite tana study tour/excursion atana budget dah a ni leh ta hi lawmawm kan ti hle," an ti. MSU tarlan danin, zirlaite study tour/excursion neihna tur sum budget-a dah chungchangah hian April 12, Ningani khan Higher & Technical Education under secretary Malsawmdawngliani'n order a chhuah a ni.