PWD Minister-in kawng leh lei a enfiah

PWD minister Lal Thanzara chuan April 12, Ningani khan National Highway no. 54, Aizawl leh Kawnpui inkar kawng thawm ṭhat hna thawh mek a enfiah a; Sihhmui leh Lengpui inkara Tlawng l;ei thuam chak hna thawh mek a enfiah bawk.

PWD Minister chuan, NH-54 Aizawl-Kawnpui inkara kawng siam hna thawktu contractor chu fûr thlen hma ngeia kawng chhe lai zualte siam ṭha turin a hrilh a; hna thawh chu work schedule duan anga thawh a nih leh nih loh te, bungrua, khawl leh hnathawktu an neih dante leh an hnathawh a ṭhat leh ṭhat lohte vila en zui reng turin PWD engineer-te a chah. Kawngpui chu Mizoram châk lakna kawngpui ber a nih avangin fûr hma ngeiin a chhe zual laite siam zawh ngei a ngaih thu a sawi a ni.

Buichali leh Khamrang inkar kawnga Railways hna thawh vanga leivûngin kawng sira tuihâwk luankawr leh culvert a hnawhte chu thianfai turin Railways engineer-te a hrilh a; Railways engineer-te pawhin a zualpui chu fûr hma ngeia an tihfai tur thu an sawi.

NH-54 Kawnpui leh Aizawl inkar hi hlawm pathum - Kawnpui - Khamrang (chainage 118/00 - 133/00 KMP), Khamrang - Buichali (chainage 133/00-147/800 KMP) leh, Buichali - Aizawl (chainage 153/00-183/00)-ahte ṭhen a ni.

Kawnpui-Khamrang chu kum 2015 khan SARDP-NE Phase 'A' Package No. 1/54 hnuaiah zauh leh siamṭhat a ni a; tunah hian NEDP sum cheng nuai 91.26 hmangin kawng khuarte hnawh hna (pot hole repair) thawh mek a ni.

Khamrang-Buichali pawh kum 2014 khan SARDP-NE Phase 'A' Package No. 2/54 hnuaiah zauh a ni a; 'Strengthening, profile correction and redesigning of pavement' atan March 12, 2018-ah sanction hmuh niin, tender amount chu cheng vbc. 31.58 a ni. NEDP sum cheng nuai 161.07 hmangin kawng khaur hnawh leh a chhe zual siam hna thawh mek a ni bawk.

Buichali - Aizawl chu kum 2013-ah chei ṭhat (periodic renewal) hna thawh zawh niin, defect liability period chu January 21, 2016-ah a zo tawh a; periodic renewal thawh ṭan mek a ni. Periodic renewal atan hian cheng vbc. 25.56 ruahman a ni a, MB-BKA(JV), Assam-in an thawk a ni.

PWD Minister-in kawng leh lei siam mek a enfiahnaah hian PWD engineer-in-chief Vanlaltluanga leh kawng enkawltu NH Division-III superintending engineer Lalruata leh engineer dangte'n an ṭawiawm.