Hnahthial dist, Tuipuiral leh Sangauah ráltlân mi 4,190 vel an awm mek
Myanmar tualchhung buaina avanga sahimna zawnga Mizorama lut an awm belh zel a; Champhai district-a Tuipuiral huam chhung, Hnahthial district leh Lawngtlai district-a Sangau leh a chhehvelahte Myanmar raltlan mi 4,190 vel an awm mek.
Myanmar ráltlân hi Hnahthial district-ah mi 1,364 vel, Tuipuiral huam chhungah 2,326 vel leh Sangau khuaah mi 500 vel an awm mek a; an vaiin mi 4,190 vel an ni. Mizorama Myanmar ráltlân awm mek hi a zat dik tak hriat a harsa a, hmun hrang hrang aṭanga report Vanglaini-in a dawn dan a inang lo a, hmun ṭhenkhatah ráltlân lut tawh zawng zawng zat dawn a nih laiin, hmun ṭhenkhat aṭangin tuna awm mek zat dawn a ni thung.
Tuipuiral, Champhai district
Tuipuiràl group YMA huam chhung khaw hrang hrangah nimin chawhnu thleng khan Myanmar ráltlân mi 2,326 vel an awm mek a, chu'ng zinga mi 200 vel chu khaw chhungah awm loin, Mizoram leh Myanmar inrìna Ṭiau lui kam, Vaphai ramah an awm mek.
Tuipuiral Group YMA secretary B Challianngura hnen aṭanga thu dawn danin, ráltlânte chu Vaphai, Thekte, Farkawn, Khankawn leh Thekpui khuaahte khung hran phawt zel an ni a; Rapid Antigen Test an paltlang hnuah an duhna hmun an pan phalsak an ni. Kal duhna bik nei lote chu Tuipuiral group huam chhunga khaw hrang hrangah an sem darh ṭhin.
Hnahthial District
Hnahthial DC Office chhinchhiah danin, Hnahthial district-ah nimin chawhma lam thleng khan Myanmar ráltlân 2,063 an lut tawh a, chhungkua 343-a mite an ni. Mi 2,063 zinga 699 chu tun hnaia buaina chhuah thar hmaa lut an ni a, mi 1,364-te chu September 10-a Lungler sipai camp beih a nih avanga September 9 hnua rawn lutte an ni thung.
September 21, Thawhlehni zan khan Peniel Children Home, Thantlang, Myanmar-a awmte chuan Sangau aṭangin Khawhri an thleng a, naupang 18 leh home dintu nupa niin, an vaiin mi 20 an ni a, hnuchham naupangte chu kum 4-19 inkar an ni.
Hnahthial DC Office chhinchhiah danin, September 21 chhûn lamah lut an awm lo a, September 20-ah mi 10 an luh belh a, September 19-ah mi pasarih an lut a ni.
Hnahthial District Education Office chhinchhiah danin, ráltlân naupang zinga 141-in Hnahthial district chhungah zirna an chhunzawm a, mipa 75 leh hmeichhia 66 an ni. Primary school-ah naupang 103, middle school-ah 32, high school-ah panga, higher secondary school-ah pakhat an lut a ni.
Hnahthial district-a khaw hrang hrangah Myanmar ráltlânte chenna turin camp an sak belh mek zel bawk. Raltlan Relief & Management Committee, Thingsai chuan, Myanmar aṭanga ráltlân lutte tan theihtawp chhuahin hma an la zel tih tarlangin, "Kan unaute hlau leh thlabára lo kalte hi kut kuangkuaha thlir kan tum lo," an ti.
Thingsai RRMC tarlan danin, Thingsai khuaa ráltlân an luh hmasak ber ní an chhinchhiah chu March 5, 2021a ni a, nimin chawhma lam thleng khan mi 877 an lut tawh. Ráltlân zinga ṭhenkhat chu khaw danga chhungte bêl tura an kal bakah, a tìr lama Myanmar-a lêt lehte an awm avangin an chhinchhiah zat chu a dik chiah lo thei tih sawiin, "Thingsai ram chhunga chámbáng, awm zat hriat tumin chhiarpui neih mek a ni," an ti.
Sangau, Lawngtlai district
Sangaua chanchinbu Chhawkhlei Times editor FC Vanlalzawna hnen aṭanga thu dawn danin, Sangau khaw chhungah hriat theih chin September 20, 2021 thleng khan Myanmar ráltlân mi 501 an awm mek a, chungte chu chhungkua 112-a mite an ni.
Sangau khaw chhung veng hrang hranga ráltlân awm dan chu - Sangau I-ah chhungkua 37-a mi 166, Sangau II-ah chhungkua 38-a mi 165, Sangau III-ah chhungkua 15-a mi 61 leh Sangau IV-ah chhungkua 22-a mi 109 an ni. Heng bakah hian inkhung hrantir rih eng emaw zat an awm bawk.
Sangau khawtlang chuan Myanmar ráltlânte awmna tur refugee camp an sa nual tawh a, Sangau-I leh Sangau-II VC leh tlawmngai pawlte chuan September 20 khan khawtlang huap hnatlang neiin, ráltlânte chenna tur an sa a; September 17 & 18 khan Sangau-III khawtlangin an sa tawh a, Sangau-IV khawtlang pawhin ráltlânte awmna tur an ruahman lâwk vek bawk. Camp sak nan bialtu MLA H Biakzaua chuan Rs. 20,000 leh silpauline 24 a pe a ni.
Lai Women Association (LWA)-te chuan an khaw chhungah ráltlânte tan bungbel, thuamhnaw leh pawnthuah an khawn khawm a, eng emaw zat la khawm tawhin, chu'ngte chu a ṭul angin an sem dawn a ni.