CRPF-te Vairengteah an kal kual

September 21, Thawhlehni khan Mizoram leh Assam ramria duty CRPF-te chu Vairengte khaw chhungah silai nen an kal kual a, rei vak lo an awm hnuah an awmna hmunah an kîr leh.

Rengkhawpui editor Lalengkima hnen aṭanga Vanglaini thu dawn danin, CRPF-te hian patrolling nei ṭhin mah se, khaw chhung an lut ngai lo a, Thawhlehnia khaw chhunga an luh avangin mipui an thlabâr hman deuh a ni.

Vairengte khaw chhung thlenga CRPF an kal hi Assam DGP thupek vang nia sawi a awm a, mahse, CRPF lam chuan an hotu thar tihtir a nih thu an sawi thung.

Kolasib SP Vanlalfaka chuan, CRPF-te chu khaw chhunga silai nena kal kual tawh lo turin a hriattir nghal a, niminah chuan CRPF-te hi khaw chhungah an lut tawh lo a ni.