ICU siam belh ngaihthahah sorkar puh
Congress party ṭhalaite chuan, Mizoram sorkarin Covid-19 vei na zualte enkawlna tura mamawh ICU siam belh a ngaihthah nia sawiin, pawi an tih thu an tarlang.
Nimina MPYCC thuchhuah chuan, Mizoramah hripui léngin zual lam a pan zel nia ngaih theih turin ni tin hri vei hmuh chhuah thar sang chuang an awm ta zel tih a tarlang a, "Heti taka hri kai thar an tam em em a, India rama hri vei mek leh kai thar tam lama palina hial kan nih lai hian hri vei na tak tak enkawlna lama sorkar a che muang em em hi a pawi kan ti tak zet a ni," a ti.
Congress ṭhalaite chuan, September 22 thlengin Mizoramah hripui vei enkawl mek mi 15,363 an awm tih sawiin, "Hetih lai hian Covid-19 vei na zual enkawlna tur intensive care unit (ICU) khum 34 chauh kan nei hi a pawi tak zet," an ti a; Mizoram dinhmun enin, hripui vei na zual tan damdawi-in khum chan a harsa a, vana rah ang mai a tling tawh niin an tarlang.
MPYCC chuan, hripui vei damlo na zual enkawlna tur ICU, oxygen leh ventilator awmna siam chu thil theih loh a ni lo tih sawiin, "Aizawl leh district dang khawpuiah a rang thei ang bera ICU bun nghal mawlh mawlh hi kawng chhâwng, lei verh, rawmi chìn leh airport cute ber siam aia kan mamawh hmasa a ni," an ti.
ZMC-ah Covid-19 vei enkawlna ward pariatah khum 268 leh risk ward-ah khum panga a awm a, Kulikawn damdawi-inah khum 50 a awm bawk tih sawiin MPYCC chuan, "Hengte hian sorkar chak tâwk lohzia leh Health minister Dr R Lalthangliana leh Medical Operational Team chairman Dr ZR Thiamsanga ten a taka Covid-19 donaa an thawh ṭhat lohna leh na taka tuartute enkawlna tur siam kawnga an hlawhchhamzia a lang," tiin an tarlang.
Covid-19 donaa hmalakna hmasa tur ngaihthahah Mizoram sorkar puhin MPYCC chuan, sorkar laipui leh Prime Minister pawhin sample test zawng zawng 70% tal RT-PCR hmanga test tura a tih laiin, ZMC laboratory pakhat chauh kum hnih dawn hman a ni tawh tih an sawi a, "ICMR-in RAT negative-te RT-PCR hmanga test leh tur a tih kan zâwm lo a, hripui donaah nasa takin kan hlawhchham," an ti a; hripui vei an pung zel chu a mawhphurtu tan bànna tham a nih thu an sawi.