RT-PCR lab. neih theih nan Lunglei NGO-te'n ṭanho an rêl

Nimina Lungleia tlawm­ngai pawl hrang hrang hruaitute ṭhukhawm chuan Lunglei-in RT-PCR labora­tory an neih ngei theihna turin ṭanho an remti.

Ṭhutkhawmah hian YMA Sub-Hqrs, Lunglei, Mizoram Upa Pawl, MHIP, Mizo Zirlai Pawl, Mizo Students' Union, Lunglei Ṭhalai Pawl leh Chhimbial Chhantu aiawhte an tel a ni.

Lunglei NGO-te resolution
1) RTPCR lab. dinna chungchanga YMA Sub-Hqrs., Lunglei hmalakna turah ṭanho zel ni se, NGO hrang hrangte Sub-Hqrs. YMA-in min kaihruai se.
2) RT-PCR lab. dinna tura sorkarin kut a thlak mekna Tourist Lodge hi October 2021 chhung ngeia hman theih a peih tura YMA Sub-Hqrs., Lungleiin ngenna thu a lo chhuah tawh hi Joint NGO chuan kan thlâwp tlat. Hemi hun chhunga peih a nih loh chuan Sub-Hqrs. YMA kaihhruainain a ṭul angin a tàwp thlengin hma kan la ang.
3) Mizoram sorkarin chhim lam tana RT-PCR lab. a dinna turah hian chak lehzuala hma a lak theih nan kal khawmte hian hnathawh kal mek kan en zui reng dawn a ni.
4) YMA Sub-Hqrs., Lungleiin Tourist Lodge-a RT-PCR lab. din lailâwkna tura hnathawk vil leh endik tura a inhuamnaah Joint NGO chuan eng lai pawhin kan thawhpui zel dawn.
5) Covid-19 léng mek karah chhim lam nasa taka kan buai lai leh mipuite'n nasa taka RT-PCR lab. min dinsak tura kawng hrang hranga sorkar kan auh lai hian, hma min lakpui ve tur leh theihtawp min chhuahpui ve tawh turin Lunglei MLA-te kan phût tlat a ni.