UNICEF-in RT-PCR a pek tur zingah Aizawl leh Champhai damdawi-in a tel ; Lungleia RT-PCR bunna tur chei ṭan a ni

United Nations International Children's Emergency Fund (UNICEF) chuan India ram tan RT-PCR khawl 57 a pe dawn a, chu'ng khâwlte dawng tura ICRM-in a thlan zingah Civil Hospital, Aizawl leh Champhai District Hospital-te a tel. Hetih lai hian, Lungleia RT-PCR laboratory bunna turin Tourist Lodge, Zotlang chei ṭhat mek a ni.

Indian Council of Medical Research (ICMR) chuan tun hnai khan RT-PCR khawl an sem dan tur an tichhuak a, a dawng tur damdawi-in leh an awmna khawpuite a tarlang.

ICMR chuan, RT-PCR khawl sem tur chu state chhunga swab sample endik kalpui puihna atan a nih thu tarlangin, "Khawl siamtu BIO RAD-a thawktute a hmunah kalin an bun dawn a ni," a ti a, a hma thei ang bera bun zawh a nih theih nan thawktute puibàwm turin a dawngtu turte a ngen.

Hetih lai hian, Health minister Dr R Lalthangliana chuan, RT-PCR dawn tur chu Mizoram sorkarin official-in a la dawn loh thu a sawi a, "RT-PCR khawl chauh nge, mamawh dang kan dawng dawn tih pawh kan la hre lo. A khawl bakah hian mamawh dang chi hrang hrang eng emaw zat bakah, thawktu tur thlengin ngaihtuah a ngai a ni," a ti.

Health Minister chuan, September 20, 2021 aṭangin Lungleia RT-PCR khawl bunna atana tih, Zotlang venga Tourist Lodge chu chei ṭhat ṭan a nih thu sawiin, "Tunah hian ngawrh takin a chei ṭhat hna thawh mek a ni a, buaipui ngai a tam khawp mai," a ti a; Tourist Lodge chei zawh a nih hun tur a la sawi theih loh thu a sawi.

Dr R Lalthangliana chuan, Tourist Lodge chei ṭhat a nih veleh khawl bun turin rang taka hmalak a nih dawn thu a sawi a, "Thawktu tur chu a remchan dan ang angin kan inpawt khawm mai ang," a ti.

Thu dawn danin, Tourist Lodge chei ṭhat hna thawh mek hi YMA Sub-Headquarters, Lunglei hruaitute chuan a hmunah an vil ṭhin a ni.

Tarlan tawh angin, High Court thupek anga Lungleia RT-PCR laboratory bun tura tihah hmalak a nih lawk loh avanga RT-PCR for Chhimbial-in Court thupek zah lo leh zâwm duh lo (contempt of court)-a mi pasarih an puhna chu Gauhati High Court (GHC), Aizawl Bench chuan September 14, 2021 khan ngaihtuahin a pawm a ni.