NE state danga hripui vei hmuh belhkhawm aiin Mizorama hmuh thar a tam zawk

September 21, Thawhlehni khan India hmarchhak state pariatah Covid-19 vei mi 2,353 hmuh chhuah a ni a, chu'ng zinga 1,355 chu Mizorama hmuh chhuah a ni. Mizorama hmuh zat hi hmarchhak state dang pasariha hmuh belh khawm aiin 357-in a tam zawk.

Sorkar laipuiin nimin zing lama Covid-19 positive result a tihchhuaha a lan danin, September 21 khan Mizoramah hripui vei mi 1,355 hmuh chhuah chu hmarchhak puma hmuh zat 2,353 aṭangin 57.59% a tling a; hmarchhak state dang pasariha hmuh chhuah zat belh khawm chu 998 a ni a, mi 500 hmuh tlinna state dang a awm lo.

Nimin zinga Covid-19 positive result tihchhuah a nih hnuah Mizoramah hripui vei enkawl mek (active case) mi 15,363 an awm a, an tam lai ber a ni. Hmarchhak state dang pasariha active case belh khawm chu 10,996 a ni a, state pasariha hripui vei enkawl mek belh khawm aiin Mizorama enkawl mek mi 4,367-in an tam zawk.

Covid-19 positive hmuh tawh zat aṭanga enkawl mek zat percentage-ah pawh hmarchhak state mai bakah, India ram pumah Mizoram a sàn fàl belh zel a; nimin zing lam khan Mizoram chu 18.55% niin, a hma nia 18.59% aiin a hniam hret a, Mizoram dawta active case sanna ber Kerala-ah 3.56% niin, a hma nía 3.70% aṭangin a tlahniam hret ve bawk.

Hmarchhak state zingah Mizoram chu Covid-19 vanga thih belh tamna ber dawttu a ni a, Assam-ah mi paruk thih belhin, Mizoramah mi panga an thih belh. Manipur leh Nagaland-ah mi pathum ve ve thiin, Meghalaya leh Arunachal Pradesh-ah mi pakhat ve ve an thi a, Sikkim leh Tripura-ah thih belh an awm lo.

India rama state 28 leh union territory pariat zingah Mizoram chu Covid-19 vei September 21-a hmuh chhuah tam lamah palina a ni ve ve leh a; India ram pumah mi 26,964 hmuh chhuah niin, chumi aṭanga Mizorama hmuh zat 1,355 chu 5.03% a tling.