Covid-19 vangin mi 270 an thi tawh

Covid-19 vangin nimin khan mi pahnih an thi. Sorkar chhinchhiah angin, nimin tlai dar 5 thleng khan Mizoramah Covid-19 vangin mi 270 an thi tawh a, September thla bikah mi 53 an thi tawh.

Nimin zing dar 5:15 khan A Sangtuahkhupa (75), Chawngtelui, Lawngtlai district chu hripui vangin Lunglei Dedicated Covid Health Centre-ah a thi a, natna dang nei sa a ni. Covid-19 vei a ni tih September 16 khan hmuh chhuah a ni a, September 19 khan DCHC-ah dah luh a ni.

Hripui vei enkawl lai T Hmangaihzama (61), Lunglei Venglai chu nimin chawhnu dar 1 khan State referral Hospital-ah a thi a, hripui vanga thi 270-na a ni. Covid-19 positive a ni tih August 21 khan hmuh chhuah niin, August 31 aṭangin SRH-ZMC-ah enkawl a ni a, natna dang nei sa a nih thu sorkar thuchhuakin a tarlang.

September 21, Thawhlehni tlai dar 3:25 khan Bobby Lalthanpuia (43), Lunglei Bazar Veng pawh Covid-19 kaihhnawih vangin a thi. Sorkar thuchhuak chuan, "Lunglei Civil Hospitalah vawiin (September 21) khan inentir tura kalpui niin, screening-ah Covid-19 hri a kai tih hriat chhuah a ni a, a boral zui nghal a ni," a ti.

Heti hian, September 21, 2021 khan Covid-19 vangin mi paruk an thi a, hripui vanga Mizorama thi an tam ber ní a ni.