KHAWTHLIR

Lehkhabu tlangzarh
Hrangbana College-a Research & Consultancy Cell leh Internal Quality Assurance Cell-te lehkhabu buatsaih 'Inter-Disciplinary Covid19 Pandemic Research Book' tih chu nimin khan Mizoram Youth Commission chairman Dr Vanlalṭanpuia, MLA-in HBC Golden Hall-ah a tlangzarh. Lehkhabu hi HBC-a department hrang hrangin Covid-19 hripuiin kawng hrang hranga nghawng a neih dan an zir chianna a ni.

Thisen pe
BJP, Mizoram Pradesh chuan Seva Aur Samarpan Abhiyan pualin nimin khan Civil Hospital, Aizawl blood bank tan thisen unit 25 an pe a, petute mipa 24 leh hmeichhia pakhat an ni.

MLA-in tanpui
Aizawl West-III bialtu MLA VL Zaithanzama chuan nimin khan a bial chhunga veng pathum - Bungkawn, Maubawk leh Mission Vengthlang branch YMA-te hnenah oxygen concentrator a pe a, a bial veng hrang hranga MLA fund hmanga hnathawh mek leh community covid care centre-te a tlawh bawk. VL Zaithanzama chuan, "MLA fund aṭanga mamawh kan sem ṭhinte hi a neitu mipui hnenah kan pe lêt leh mai a ni," a ti.

Ambulance pe
Lawngtlai East bialtu MLA H Biakzaua chuan nimin khan Bualpui-NG Village Council hnenah khawtlang hman turin ambulance thar a pe. Ambulance inhlanna hi Bualpui NG-I community hall-ah neih a ni. H Biakzaua hian nimin khan Bualpui-NG damdawi-in tan PPE 10 a pe nghal a, Covid-19 dona leh raltlan chungchanga a ṭula hman atan pawisa leh silpauline a pe bawk.

Aieng chi inzirtir
Krishi Vigyan Kendras, Lengpui chuan nimin khan Reiek BNRGSK Hall-ah NABARD hnuaia Lengpui RD Block chhunga kut hnathawktute pualin hmasawnna hrang hrang sawihona leh inhrilhfiahna hun an buatsaih a, mithiamte'n an zirtir. Reiek leh a chhehvela chhungkaw tam takin eizawnna atana an hman aieng chi ṭha lote a chi ṭhaa thlak dan tur sawiho a ni.