INC candidate tur Chalrosanga Ralte

Indian National Congress (INC) chuan Tuirial Assembly constituency by-election neih tura an candidate atan Chalrosanga Ralte an thlang. Candidate tur hi Mizoram Pradesh Congress Committee chuan nimin khan an tifel a ni.

Vanglaini palai zawhna chhangin MPCC thupuangtu Dr Lallianchhunga chuan, an party-in candidate tur an tihfel tawh thu a sawi a, "Inthlan hun puan la ni lo mah se, MNF lamin an candidate tur an puang tawh. By-election-ah hian chak ngei kan tum avangin kan candidate-in campaign-na hun tháwl a neih theih nan a rang thei angin kan tifel a ni," a ti.

Chalrosanga Ralte hi MPCC-ah secretary a ni a, kum 2013 MLA inthlan khan Congress ticket-in Lunglei West bial aṭangin MLA atan thlan tlin a lo ni tawh a, kum 2018 inthlanah a tling lo thung.

Tarlan tawh angin, MNF party chuan Tuirial bial by-election-a an candidate tur chu K Laldawngliana a nih thu September 21 khan an lo puang tawh a; candidate neih tum dang ZPM leh BJP-te erawh chuan candidate tur an la tifel lo.