Zangnadawmna la chian loh vangin Vawk suat tihtawp lailâwk a ni

Mizoram sorkarin African Swine Fever (ASF) vanga vawk suat neitute hnena zángna­dawmna pek tur sorkar laipuia a dil chu chhànna a la dawng lo. Hei vang hian kumin August-October chhunga ASF infected area-a vawk suat ngai la awmte suat vek tura hmalakna chu chawlhsan lailâwk a ni.

ASF nodal officer Dr Lal­hmingthanga, AH&Vety joint director (Livestock Health) chuan Vanglaini palai zawhna chhángin, ASF vanga vawk suat neitute'n zangnadawmna an dawn theihna tura sorkar laipuia dilna an thlenah chhanna an la dawn loh thu a sawi a, "July 31, 2021 thlenga vawk suat 5,977 kan chhinchhiah neitute tan Ministry of Fisheries, Animal Husbandry and Dairying-ah zangnadawmna kan dilsak a, mahse, tun thlengin chhanna kan la hmu rih lo a, sorkar laipui kan la ngaichâng mek," a ti.

Sorkar laipuia zangnadawmna dilna an thlen lai hian Mizorama ASF infected area hrang hrangah vawk 48,939 suat tur a la awm anga chhût a ni a, chu'ngte chu kumin August-October chhunga suat vek tum a ni. Sorkar laipui rate anga vawk suat tur la awmte suatna senso leh zangnadawmna pek tura pawisa ngai zat an chhût chu a tlem berah cheng vbc. 58.2 vel a ni.

Dr Lalhmingthanga chuan, vawk suatna kaihhnawihah sorkar laipui puihna an mamawh thu sawiin, "Vawk kan suat neitute hnena zangnadawmna pek tur sorkar laipui aṭangin a awm dawn leh dawn loh kan la hriat loh avangin August-October thla chhunga vawk suat tura tih chu kan chawlsan lailâwk rih a ni," a ti.

Nimin thleng khan Mizo­ramah ASF vangin vawk 28,339 a thi tawh a, infected area-ah khua/veng 266 puan a ni tawh. ASF vang hian infected area chhungah vawk 10,087 leh infected area páwnah 201, a vaiin 10,277 suat a ni tawh a, ASF lènna nia rinhlelh khua/veng 92-ah vawk 508 a thi tawh bawk.