Treasury-in sum harsat vangin Bill an pe chhuak mumal lo

Sum leh paiah Mizo­ram sorkar a harsat avangin Treasury-te'n bill an pe chhuak mumal lo a, loh theih loh thil - buhfai man, kawlphetha leina man, adt. an pe chhuak ṭhin thung.

Vanglaini thu dawn danin, Treasury-ah hian bill thehluh theih reng a nih rualin, contract leh supply bill-te chu an pe chhuak mumal rih lo.

Sorkar hnathawk hlawh, buhfai man, electric man, adt. leh Finance department-in ṭul bik nia a ngaihte chauh an pe chhuak thei rih.

Tun dinhmunah chuan Treasury-te'n ni khata sum pek chhuah theih zat (ceiling) mumal an nei lo a, Finance department aṭanga thu an hmuh ang zelin bill an pe chhuak ṭhin.

Hetih lai hian, sorkar hnathawk hlawh luh khawm lai erawh chuan buaipui ngai a tam avangin bill an dawng lo a; hei hi rang leh felfai zawka hlawh chinfel a nih theihna atana tih a ni.