Green technology hmanga kawng siam Deputy speaker Lalrinawma'n enfiah

Assembly deputy speaker Lalrinawma chuan nimin khan Kanghmun South leh Neihloh khaw inkar leh Sialsuk leh Sailam inkar kawng, PMGSY hnuaia green technology hmanga siam a tlawh a; duat taka kawngpui thar enkawl turin mipui a chah.

Lalrinawma chuan, sik leh sa awm dan a danglam nasat thu sawiin, "Green technology hi hmasawnna hna thawhte'n sik leh sa leh nungchate a tlem thei ang ber a nghawng theihna tura ruahmanna a ni," a ti.

Kanghmun South-Neihloh inkar kawng hi km. 9.85-a thui niin, cheng nuai 1,610.25 sênga siam a ni a; Sialsuk-Sailam kawng chu km. 10.5-a thui niin, cheng nuai 770.76 sênga siam a ni. Kawngah hian millimetre 125-a chhah granular sub base (GSB) chungah millimetre 100-a chhah panelled cement concrete chhûn a ni.

Inkawmhonaa tarlan danin, Mizoramah PMGSY thawh khatna hmangin hmun 351-ah kawng km. 4,482.732-a thui leh a thawh hnihnaah hmun parukah kawng km. 194.250-a thui siam a ni a; a thawh thumna tur pawh kalpui theih thuai beisei a ni.

Mizoramah PMGSY hnuaia kawng siam zingah green technology hman a awm nual tawh a; cold mix hmangin km. 83.46, cell filled concrete hmangin km. 180.12 leh panelled cement concrete hmangin km. 779.84-a thui siam a ni tawh.

Green technology hmanga kawng siamin a tum ber chu - thil chhuan khûk awm loa kawng siam, leilung hausakna leh nungchate tichereu lo thei ang bera kawng laih leh siam a ni a; sorkar laipuiin kalphung thar a siamah chuan, state sorkarte chu kum tina kawng an siam tur hmachhawp zinga 15% chu green technology hmanga siam tura tih an ni.