Lawngtlai leh Khawzawlah two wheeler taxi neih an duh

September 22, Nilaini khan Lawngtlai leh Khawzawlah two wheeler taxi tlantir chungchang sawiho a ni a; two wheeler taxi neih ṭha an ti.

Lawngtlaiah chuan bawrhsap Dr Andrew H Vanlaldika hoin Lawngtlai khawpuia two wheeler taxi neih chungchang sawiho a ni a; Mizoram sorkara Transport department, LADC sorkara Transport department, police, District Consumer Forum, VC Association, Central YLA leh LSA aiawhte an tel.

Ṭhutkhawmah hian, STA-in Lawngtlai khawpuia two wheeler taxi service a remti chu Lawngtlai tan hmasawnna a nih dawn avangin khawpuiin a zawh tâwk tura ngaih permit 100 vel dil phawt ni se, an ti.

Khawzawl bawrhsap CC Lalchhuangkima kaihhruaia sorkar, páwl leh khawtlang hruaitute DC conference hall-a ṭhukhawm chuan Khawzawla two wheeler taxi tlantir chungchang an sawiho a; khawpuiin a mamawh tâwk two wheeler taxi neih ṭha an ti.

Ṭhukhawm chuan, Khawzawl mipui mamawhna phuhru thei tur leh passenger phura eizawng lirthei dang awm sate dinhmun tichhe loa two wheeler taxi neih a pawimawh an ti a; khawpui ṭhan chhoh zel dan leh Covid-19 léngin nunphung pangngai a tihbuai lutuk loh hun turte thlir chungin, Khawzawl khawpui mamawh àwm tâwk an sawiho hnuah thurelte chu thuneitu sang zawk hnenah thlen an rel a ni.

State Transport Authority-in passenger phur lirtheite hman man (passenger service vehicle rate) a siam, September 1, 2021 aṭanga hman ṭan tura tih chu Khawzawl district-ah zawm tura hmalak ni se, an ti a; rate copy chu Khawzawl Joint VC, Khawzawl district Mizoram Consumer Union leh Zoram Drivers Union hruaitute hnenah thawn ni se, MCU-in chak takin hma la zui se, an ti bawk.