Minister-in hna thawh tumna hmun a enfiah

Minister of state Robert Romawia Royte chuan nimin khan PRASAD scheme hmanga Laipuitlanga khaw thlirna sakna tur leh New Capital Complex-a Contact Sports Centre din rawtna hmun a tlawh a; combat/contact sport hrang hrangte'n an puala centre an neih theih nan indoor stadium lian tham sak ṭul a tih thu a sawi.

Robert Romawia Royte chuan, combat/contact sport discipline hrang hrangte'n an puala centre an neih theih nan indoor stadium lian tham sak a ṭul thu sawiin, "Covid hripui avangin sum sanction la awm lo mah se, sorkar laipui aṭangin beiseina sang tak kan nei," a ti.

Tourism Minister chuan, Aizawl khawpui tlawhtu khualzin leh tualchhung mite'n hawi thawvenna leh intihhlimna an mamawh thu sawiin, "Tourism department-in PRASAD scheme aṭanga khaw thlirna siam an rawt chu Tourism Ministry chuan pawmin, sanction approval lehkha tun hnaiah a tichhuak a, a taka sak dan tur duan vat a ṭul," a ti a; Laipuitlang chu PHE tuikhuah lian awmna a nih avangin PHE Minister ràwn a nih hnuah enho a nih thu leh a ṭul angin PHE tuikhuah lian pawh chei ṭhat nghal a rem theih tur thu a sawi bawk.