MPYCC-in eiruknaa inhnamhnawiha puh J Lalhmingliana bàn turin CM an ngen

Mizoram Pradesh Youth Congress Commi­ttee (MPYCC) chuan nimin khan chief minister Zoram­thanga hnenah lehkha an thehlut a, GAD (Civil Aviation Wing) principal consultant Wg.Cdr. J Lalhmingliana chu a nihna aṭanga bàn turin an phût.

Congress ṭhalaite chuan, J Lalhmingliana chu January 23, 2019 khan kum hnih leh a chanve atan Aviation principal consultant-ah ruat a nih thu tarlangin, "GAD (Civil Aviation Wing)-ah sum hman dik lohna leh dan kalha hnathawh a awm ngeia kan hriat avangin 16.4.2019 khan Lokayukta-ah complaint kan thehlut a ni. Complaint hi Lokayukta chuan thu tlingah ngaiin ACB-ah preliminary inquiry nei turin a thawn a, ACB pawhin an chhui chianna report an thehlut tawh," an ti.

Lokayukta chuan chhui chiang turin Central Bureau of Investigation (CBI) koh luh a ngai an tih avangin New Delhi-ah thu an thlen nia tarlangin MPYCC chuan, "Lokayukta-in CBI hial koh luh ngai a tih khawp nangma ruat 'political appointee' hi hum reng tum lo a, investigating agency-te kut phuar an nih loh nan leh, dik leh zalen taka chhui a nih theih nan tuna a hna aṭanga bàntir turin kan phût che a ni," an ti a; CBI ko lut tura state sorkarin hma an lâk loh chhan an zawt nghal bawk.

MPYCC chuan, Leng­pui Airport chei ṭhatna atana sum tam tak hman mekah J Lalhmingliana phènah Chief Minister a awm ngeiah mi tam takin an ngai tih tarlangin, "Civil Aviation Wing thil tih dik loh nia ngaih tam takah hian kan Chief Minister hi inrawlh ve ngeia ngaih a nih avang hian CBI koh luh hi rawt ngam lo in ni em, tih hi kan zawhna a ni," an ti.