KHAWTHLIR

Thisen pe
HBK MMA Gym, Kulikawn chuan nimin khan Synod Hospital Blood Bank-ah thisen pek an huaihawt a, mipa parukin thisen an pe. HBK MMA Gym hian kuminah ṭum thum thisen pek an huaihawt tawh a ni.

Chawimawina hlân
National Award for Best Performing Village Organization dawngtu Tipa Diary-1 Village Organization chu nimin khan Tipa RD Block chuan MADC DAO conference hall-ah chawimawina an hlan a, Mizoram State Rural Livelihood Mission chief executive officer H Lalchhandami'n a hmanpui.

Cement mistiri
Mizoram Youth Commission, SIRDPR leh Champhai District Skill Committee chuan nimin khan Champhai Zote-a Gosen Home-a awmte tan cement mistiri training an buatsaih ṭan. Training hi ni 45 awh tur a ni.

ADDMA thukhawm
Aizawl District Disaster Management Authority (ADDMA) chu an chairman Dr Lalhriatzuali Ralte, district bawrhsap hoin nimin khan Planning & Programme Implementation conference hall-ah an ṭhu a; Covid-19 donaa ADDMA hmalakna leh khuarel chhiatna chungchanga ADDMA huang chin leh mawhphurhnate an sawiho.

Hmanrua pe
Assembly speaker Lalrinliana Sailo chuan nimin khan a bial chhunga Khawruhlian leh Khanpui khua a tlawh a, khawtlang hruaitute hnenah Covid-19 dona hmanraw chi hrang hrang a pe.

Tanpuina vailiam
Khawzawl district-a chhungkaw harsa zualte chhawmdawlna tur thil chi hrang hrangte chu nimin khan Khawzawl DC CC Lalchhuangkima'n DC pisa tual aṭangin a vailiam. Chhawmdawlna sem tur hi buhfai qtl. 61.25 leh dailuah kg. 280 a ni a; Biate, Chawngtlai, Ngàizáwl leh Sialhâwk khuaa chhungkaw 280 (mi 1,225)-te hnenah sem a ni ang. Ṭanpuina tur leina atan CM Relief Fund, Khawzawl Officers Club leh mimal sum tawh Rs. 2,40,250 hman a ni.