Kawrthaha naupangte ei tur Buhfai a chhe lutukah an ngai

Hachhek Constituency Development Committee (HCDC) chuan,tun hnaia Kawrthah Primary School-IV tana chawchhun (mid-day meal) tur buhfai thleng chu mihring ei tlak loh khawpa chhia a nih thu an tarlang a; a supply-tu hrem an phût.

HCDC chuan, naupangte tana buhfai chhe lutuk pek chu rilru natthlak an tih thu tarlangin, "Thuneitute pawhin an en lâwk hmasa miah lo niin kan ngai a, mihring tana ei tlak loh petu hi a ṭul anga hrem ngei ni se kan duh," an ti a; tun hnuah thleng tawh lo se an duh thu an tarlang.

HCDC chuan, buhfai chhe lutuk pek chungchangah a ṭul ang zela hmalak zel an tum thu leh sorkarin a en zui dan leh hma a lak dan en zui zel an tum thu an sawi a, "Kan bial hmuhsitnaah kan ngai. Officer hna tlin lo chu báng ngam se kan duh a, sorkar pawhin hremna a lek ngei kan duh bawk," an ti.